Կատալոնական «Բարսելոնան» Իսպանիայի ֆուտբոլի առաջնության 35-րդ տուրում սեփական հարկի տակ 2:0 հաշվով հաղթել է Մադրիդի «Ռեալին» և ժամկետից շուտ ապահովել չեմպիոնի տիտղոսը։
Հանդիպումը կայացել է «Կամպ Նոու» մարզադաշտում։ Առաջին խաղակեսում գոլերի հեղինակներ են դարձել Մարկուս Ռեշֆորդն ու Ֆերան Տորեսը։
«Էլ կլասիկոյից» առաջ մահացել էր «Բարսելոնայի» գլխավոր մարզիչ Հանս-Դիտեր Ֆլիկի հայրը։ Գերմանացի մասնագետը, սակայն, որոշել էր չբացակայել հանդիպումից։
Այս հաղթանակից հետո «Բարսելոնան» ունի 91 միավոր և առաջնության ավարտից 3 տուր առաջ դարձել է Իսպանիայի չեմպիոն։ Երկրորդ տեղում գտնվող «Ռեալը» վաստակել է 77 միավոր։
Կատալոնական ակումբը երկրորդ տարին անընդմեջ նվաճում է տիտղոսը՝ դառնալով Իսպանիայի 29-ակի չեմպիոն։ Մրցաշարի պատմության ռեկորդակիրը մնում է «Ռեալը»՝ 36 չեմպիոնությամբ։
Հունվարին «Բարսելոնան» հաղթել էր «Ռեալին» և նվաճել Իսպանիայի սուպերգավաթը։ Կատալոնական ակումբը 16-րդ անգամ էր դարձել սուպերգավաթակիր և այդ ցուցանիշով առաջատարն է Իսպանիայում: «Ռեալը» 13-ակի գավաթակիր է։
