Չինաստանի ռազմական դատարանը կոռուպցիոն մեղադրանքներով մահապատժի դատավճիռ է կայացրել պաշտպանության նախկին նախարարներ Վեյ Ֆենգեի և Լի Շանֆուի նկատմամբ: Դատավճիռը կայացվել է երկու տարվա կասեցմամբ, ինչը նշանակում է, որ երկու տարի անց պատիժը կփոխարինվի ցմահ ազատազրկմամբ՝ առանց պատժի կրճատման կամ վաղաժամկետ ազատման հնարավորության:
Երկու բարձրաստիճան պաշտոնյաներն էլ մեղավոր են ճանաչվել կաշառակերության մեջ, և նրանց ողջ անձնական գույքը բռնագրավվել է: Վեյ Ֆենգեն պաշտոնավարել էր 2018-2023 թվականներին, իսկ նրան փոխարինած Լի Շանֆուի պաշտոնավարումն ընդհատվեց 2023-ի հոկտեմբերին՝ հանրային հարթակից նրա հանկարծակի անհայտացումից ամիսներ անց:
Այս դատավճիռները հաջորդում են Չինաստանի զինված ուժերում իրականացվող լայնածավալ հակակոռուպցիոն զտումներին: Նախագահ Սի Ծինփինը նշել է, որ բանակը ենթարկվել է «հեղափոխական կոփման» կոռուպցիայի դեմ պայքարում, թեև քննադատները պնդում են, որ նմանատիպ արշավները հաճախ օգտագործվում են նաև քաղաքական մրցակիցներից ազատվելու համար: