Apple ընկերությունը համաձայնել է վճարել 250 միլիոն դոլար՝ կոլեկտիվ հայցի գործով, որը վերաբերում է iPhone-ների արհեստական բանականության հնարավորությունների «գովազդային չափազանցմանը»։ Այս համաձայնությունից հետո iPhone-ի որոշ օգտատերեր կարող են ստանալ մինչև 95 դոլար փոխհատուցում։ Գործը վերաբերում է այն ժամանակաշրջանին, երբ Apple-ը 2024 թվականին ներկայացրեց iPhone 16-ը և մեծ շուքով գովազդեց Siri ձայնային օգնականի նոր, «խելացիացված» հնարավորությունները՝ որպես «Apple Intelligence» համակարգի մաս։
Փոխհատուցումը վերաբերում է մոտ 37 միլիոն սարքի, որոնք վաճառվել են ԱՄՆ-ում 2024-ի հունիսից մինչև 2025-ի մարտը։ Դրանց թվում են iPhone 15 Pro, iPhone 15 Pro Max և iPhone 16 մոդելները։ Յուրաքանչյուր սարքի համար նախատեսված է առնվազն 25 դոլար վճարում, իսկ առավելագույնը կարող է հասնել մինչև 95 դոլարի՝ կախված դիմողների թվից և այլ գործոններից։ Apple-ը կծանուցի օգտատերերին էլեկտրոնային փոստով կամ փոստային նամակով՝ հատուկ կայքի միջոցով հայտ ներկայացնելու համար։ Միաժամանակ, Apple-ը դեռ փորձում է հետ չմնալ մրցակիցներից՝ Google-ից և Samsung-ից, որոնք արդեն ավելի ակտիվ են զարգացնում իրենց արհեստական բանականության լուծումները։