Բելառուսի արտաքին գործերի նախարարության մամուլի քարտուղար Ռուսլան Վարանկովը մեկնաբանել է ՀՀ Ազգային ժողովի նախագահ Ալեն Սիմոնյանի վերջին հայտարարությունները՝ դրանք որակելով որպես նախընտրական պոպուլիզմ և իբրև սեփական հանրության ուշադրությունը ներքին ծանր խնդիրներից շեղելու փորձ:
Բելառուսական կողմի պնդմամբ՝ Հայաստանի իշխանությունները փորձում են այսպես կոչված «արտաքին թշնամու» կերպար ստեղծել՝ քողարկելու համար երկրում առկա սոցիալ-տնտեսական բարդ վիճակը, աղքատության բարձր մակարդակն ու գործազրկությունը:
Վարանկովն ընդգծել է, որ Բելառուսը ինքնիշխան պետություն է և ինքնուրույն է որոշում Ռուսաստանի հետ իր դաշնակցային հարաբերությունների ձևաչափը, ուստի անթույլատրելի է համարում որևէ կողմի միջամտություն կամ դասեր տալու փորձերը: