Պարսից ծոցում իրավիճակը կտրուկ սրվել է՝ ԱՄՆ-ի և Իրանի միջև նոր ռազմական գործողությունների ֆոնին։
ԱՄՆ-ը հայտարարել է, որ ոչնչացրել է իրանական մի քանի փոքր ռազմական մոտորանավակ։ Նախագահ Դոնալդ Թրամփը նշել է, որ ամերիկյան ուժերը «խոցել են» առնվազն յոթ նավ, թեև ավելի վաղ ամերիկացի բարձրաստիճան զինվորականները խոսել էին վեց նավի մասին։
Իրանը, իր հերթին, կտրականապես հերքել է այդ տեղեկությունները՝ պետական հեռուստատեսությամբ փոխանցելով, որ նման կորուստներ չեն եղել։
Նույն օրը Միացյալ Արաբական Էմիրությունները հայտարարել են, որ ենթարկվել են հրթիռային և անօդաչու թռչող սարքերի հարձակումների՝ դրանք գնահատելով որպես Իրանի կողմից հակամարտության լուրջ էսկալացիա և ընդգծելով պատասխան միջոցներ ձեռնարկելու իրավունքը։ Հաղորդվել է նաև, որ հարվածների հետևանքով վնասվել է նավթային ենթակառուցվածքներից մեկը։
Միջադեպերը հաջորդել են Հորմուզի նեղուց ամերիկյան ռազմածովային ուժերի մուտքին։ Նրանք նպատակ ունեին ապահովել այնտեղ արգելափակված առևտրային նավերի անվտանգ անցումը։ Նեղուցը համարվում է համաշխարհային էներգակիրների փոխադրման կարևորագույն ուղիներից մեկը և գործնականում փակ է մնացել այն բանից հետո, երբ տարածաշրջանում լայնածավալ ռազմական գործողություններ սկսվեցին ԱՄՆ-ի և նրա դաշնակիցների մասնակցությամբ։
Օրվա ընթացքում մի շարք առևտրային նավեր հայտնել են պայթյունների և հրդեհների մասին։ Թրամփը նաև հայտարարել է, որ Իրանը հարվածներ է հասցրել հակամարտության հետ անմիջական կապ չունեցող պետությունների նավերին՝ մասնավորապես հիշատակելով հարավկորեական նավ։ Նա կոչ է արել միջազգային գործընկերներին ակտիվացնել իրենց մասնակցությունը և աջակցել տարածաշրջանում առևտրի անվտանգության ապահովմանը՝ ընդգծելով, որ «ժամանակն է, որպեսզի Հարավային Կորեան ևս միանա այս առաքելությանը»։
Միաժամանակ Թրամփը ներկայացրել է իր նոր նախաձեռնությունը՝ «Ազատություն նախագիծ» անվամբ, սակայն դրա մանրամասները չի հրապարակել։ Նախագահը հայտարարել է, որ պատերազմը «ավարտված է», թեև այս պնդումը վիճարկվում է ԱՄՆ Կոնգրեսի մի շարք անդամների կողմից, որոնք ընդգծում են ռազմական գործողությունների շարունակական բնույթը։
Իրանի արտաքին գործերի նախարար Աբբաս Արաքչին արձագանքելով զարգացումներին՝ նշել է, որ վերջին իրադարձությունները ցույց են տալիս ճգնաժամի ռազմական լուծման բացակայությունը։ Նրա խոսքով՝ խաղաղ բանակցությունները շարունակվում են Պակիստանի միջնորդությամբ, և նա զգուշացրել է ԱՄՆ-ին ու ՄԱԷ-ին չխորացնել հակամարտությունը։ ««Ազատություն նախագիծը» իրականում «Փակուղի նախագիծ» է»,– գրել է նա սոցիալական ցանցերում։