ԿԸՀ-ն սահմանել է նախընտրական քարոզչության համար եթերաժամի տրամադրման կարգը

ՀՀ Կենտրոնական ընտրական հանձնաժողովն արտահերթ նիստով սահմանել է խորհրդարանական ընտրությունների նախընտրական քարոզչության կարգը։ Որոշմամբ սահմանվել են հանրային և մասնավոր հեռարձակողների կողմից կուսակցություններին ու դաշինքներին տրամադրվող անվճար և վճարովի եթերաժամերի սկզբունքներն ու ժամանակացույցը։

Համաձայն ԿԸՀ որոշման՝ ընտրություններին մասնակցող յուրաքանչյուր քաղաքական ուժի Հանրային հեռուստաընկերության «Առաջին ալիք» և «Առաջինի լրատվական ալիք» ծրագրերով կտրամադրվի՝

Անվճար եթերաժամ. ընդհանուր ոչ ավելի, քան 90 րոպե:

Վճարովի եթերաժամ. ընդհանուր ոչ ավելի, քան 120 րոպե:

Քարոզչական հոլովակները կհեռարձակվեն ժամը 18:00-ից սկսած։ Հատուկ ուշադրություն է դարձվել մատչելիությանը. բոլոր հաղորդումները կուղեկցվեն ժեստերի լեզվով թարգմանությամբ և հայերեն ենթագրերով:

Ռադիոլսողների համար Հանրային ռադիոյով նախատեսված է ավելի ընդարձակ ժամանակացույց՝ ընդհանուր 150 րոպե անվճար և 180 րոպե վճարովի եթերաժամ։

Ռադիոեթերը կտրամադրվի ժամը 13:30-ից։ ԿԸՀ-ն շեշտում է, որ վճարովի եթերաժամը կհաջորդի անվճարին՝ պահպանելով սահմանված հերթականությունը։

Մասնավոր հեռարձակողներ և հավասարության սկզբունքը

Հանրային մուլտիպլեքսում սլոթ ունեցող մյուս բոլոր հեռարձակողները (մասնավոր հեռուստաալիքները) պարտավոր են յուրաքանչյուր կուսակցության տրամադրել առնվազն 25 րոպե անվճար եթերաժամ: Նրանք կարող են նաև վճարովի հիմունքներով եթերաժամանակ տրամադրել, սակայն պարտավոր են ապահովել հավասար և միատեսակ պայմաններ բոլոր մասնակիցների համար՝ բացառելով որևէ խտրականություն։Նշենք, որ նախընտրական քարոզչության պաշտոնական փուլը մեկնարկում է մայիսի 8-ին և կավարտվի հունիսի 5-ին՝ ընտրություններից երկու օր առաջ, որին կհաջորդի «լռության օրը»։

Հիշեցնենք` ՀՀ–ում հերթական խորհրդարանական ընտրությունները կկայանան 2026 թվականի հունիսի 7-ին։ Դրանց մասնակցում է 19 քաղաքական ուժ։