Աստղագետներն առաջին անգամ ռենտգենյան ճառագայթների միջոցով արձանագրել են Արեգակնային համակարգի այսպես կոչված «շնչառությունը»։ Այն առաջանում է, երբ Արեգակից եկող լիցքավորված մասնիկների հոսքը՝ արևային քամին, բախվում է Երկրի մթնոլորտին և հելիոսֆերային՝ համակարգը շրջապատող պաշտպանիչ շերտին։ Հետազոտությունը կատարվել է eROSITA տիեզերական աստղադիտակով, որը գտնվում է Երկրից մոտ 1,5 միլիոն կմ հեռավորության վրա։ Գիտնականները պարզել են, որ այս «փափուկ ռենտգենյան» լուսարձակումն առաջանում է արևային քամու իոնների և չեզոք ատոմների փոխազդեցությունից։
Նախկինում այն դիտարկվում էր որպես խանգարող ազդանշան, սակայն այժմ դարձել է կարևոր գիտական տվյալ։ Բացահայտումը նաև ցույց է տալիս, որ արևային քամին փոխվում է Արեգակի ակտիվության 11-ամյա պարբերաշրջանին (ցիկլին) համապատասխան՝ տարբեր փուլերում ուժեղանալով կամ թուլանալով։ Դրա շնորհիվ գիտնականներն այժմ ավելի լավ են հասկանում, թե ինչպես է «շնչում» մեր Արեգակնային համակարգը և ինչպես է արևային քամին ազդում տիեզերական միջավայրի վրա։