NASA-ի «Curiosity» մարսագնացը հայտնաբերել է նախկինում անհայտ օրգանական մոլեկուլներ, այդ թվում՝ ազոտային միացություններ։ Գիտնականների խոսքով՝ սա ևս մեկ կարևոր հուշում է, որ Մարսի հնագույն պայմանները կարող էին նպաստավոր լինել կյանքի առաջացման համար։ Ուսումնասիրված նմուշում հայտնաբերված 21 ածխածնային մոլեկուլներից 7-ը Մարսում արձանագրվում են առաջին անգամ։ Սակայն NASA-ն շեշտում է՝ դեռևս հստակ ապացույց չկա, որ դրանք կենսաբանական ծագում ունեն․ հնարավոր են նաև զուտ երկրաբանական գործընթացներ։
Հատկապես ուշադրություն է գրավել ազոտային հեթերոցիկլերի հայտնաբերումը, որոնք համարվում են ՌՆԹ-ի և ԴՆԹ-ի կառուցվածքային «նախահայրերը»։ Սա գիտական համայնքում դիտվում է որպես կյանքի քիմիական հիմքերի հնարավոր հետք։ NASA-ում ընդգծում են՝ յուրաքանչյուր նման հայտնագործություն մոտեցնում է պատասխանին այն հարցին, թե արդյոք Մարսը երբևէ եղել է կյանքի համար հարմար մոլորակ։