Հայաստանի պաշտպանության նախկին փոխնախարար Վահրամ Խորխոռունու սպանության գործով Ռուսաստանի Դաշնությունում կալանավորել են սպանության գործով անցնող Հրայր Նարիմանյանին։ Մեզ հասած տեղեկությունների համաձայն՝ վերջինս ՌԴ իրավապահներին հայտնել է, որ պատրաստ է ներկայանալ ՀՀ ուժային կառույցներին։ Արդյունքում ՀՀ գլխավոր դատախազությունը ապրիլի 13-ին դիմել է ՌԴ իրավասու մարմիններին՝ Հրայր Նարիմանյանին Հայաստանին արտահանձնելու համար։ Դիմեցինք Գլխավոր դատախազություն, որտեղից պահանջեցին գրավոր հարցում ուղարկել։
Հիշեցնենք, որ 2025 թվականի հուլիսի 25-ին ՀՀ քննչական կոմիտեն հայտնել էր, որ բացահայտվել է Հայաստանի պաշտպանության նախկին փոխնախարար Վահրամ Խորխոռունու սպանությունը։ Ըստ նախաքննական մարմնի՝ Սասուն Առուշանյանը, Հրայր Նարիմանյանը և Արմեն Առաքելյանը 1998 թվականի դեկտեմբերի 10-ին, շահադիտական դրդումներով, Սասուն Առուշանյանի կազմակերպմամբ և համակատարմամբ, իրականացրել են սպանությունը, ինչպես նաև ապօրինի կերպով ձեռք են բերել և պահել հրազեն։ ՔԿ-ի տվյալներով՝ Սասունը, լինելով զինծառայող, կազմակերպել է սպանությունը և 1998 թվականի նոյեմբեր-դեկտեմբերին այդ նպատակով պայմանավորվել է Լեռնային Ղարաբաղի բնակիչներ Հ.Ն.-ի և Ա.Ա.-ի հետ՝ նրանց խոստանալով համապատասխանաբար 10 000 և 15 000 դոլար։
Սպանությունն իրականացնելու նպատակով ձեռք է բերել «Մակարով» տեսակի ատրճանակի ինքնաշեն փող և խլացուցիչ, որոնք տեղադրել է իր ապօրինի պահվող «Մակարով» տեսակի 9 մմ տրամաչափի ատրճանակի վրա։ Ատրճանակը փորձարկել է քաղաքից դուրս՝ ստուգելով ձայնի խլացման աստիճանը։ Խլացուցիչի արդյունավետությունը բավարար չլինելու պատճառով Նարիմանյանի օգնությամբ քանդել և նորից ինքնաշեն եղանակով հավաքել է փամփուշտները՝ նվազեցնելու վառոդային լիցքը։
1998 թվականի դեկտեմբերի 7-ին վերոնշյալ անձինք եկել են Երևան՝ իրենց հետ բերելով հանցագործության գործիք հանդիսացող հրազենը։ Սասուն Առուշանյանը հանցակիցներին ցույց է տվել շենքը, որտեղ բնակվել է Վահրամ Խորխոռունին։ Դեկտեմբերի 9-ի երեկոյան նրանք հանդիպել են Հանրապետության հրապարակում և Հ.Ն.-ի վարած մեքենայով գնացել Խորխոռունու բնակության վայր, որտեղ դարանակալել են։
Ըստ նախնական դերաբաշխման՝ Հ.Ն.-ն մնացել է մեքենայում, իսկ Ս.Ա.-ն և Ա.Ա.-ն՝ շենքի մուտքի մոտ։ Դեկտեմբերի 10-ին՝ ժամը 00։30-ի սահմաններում, երբ Խորխոռունին մտել է շենքի մուտք, Ս.Ա.-ն և Ա.Ա.-ն, փոխլրացնելով միմյանց, արձակել են հինգ կրակոց՝ երեքը դեմքի, երկուսը՝ ձախից կրծքավանդակի թիկնային մակերեսի շրջանում։ Վահրամ Խորխոռունին մահացել է տեղում։
Եվ ահա Սասուն Սուրենի Առուշանյանի մասով գործը դատարան է ուղարկվել, և այն մակագրվել է դատավոր Գևորգ Պողոսյանին։ Սասուն Առուշանյանը այս պահին կալանավորված է։ «Ժողովուրդ» օրաթերթի բացառիկ տեղեկությունների համաձայն՝ գործը դատարան ուղարկվելուց հետո ձերբակալված և այնուհետև կալանավորված Սասուն Առուշանյանի կալանքը փոխարինվել էր տնային կալանքով, իսկ օրեր առաջ գործը քննող դատավոր Արտակ Կարապետյանը կալանքը վերացրել է և վերջինիս նկատմամբ սահմանել վարչական հսկողություն։
Քնար Մանուկյան
Մանրամասները՝ տեսանյութում․