Չինաստանի նախագահ Սի Ծինփինը Սաուդյան Արաբիայի թագաժառանգ Մոհամմեդ բին Սալմանի հետ հեռախոսազրույցում վերահաստատել է Հորմուզի նեղուցով բնականոն նավագնացությունը վերականգնելու անհրաժեշտությունը։
Չինական պետական լրատվամիջոցների փոխանցմամբ՝ սա Պեկինի երկրորդ բարձր մակարդակի դիվանագիտական շփումն է Մերձավոր Արևելքի առաջնորդների հետ մեկ շաբաթվա ընթացքում, ինչը վկայում է տարածաշրջանում լարվածության սրման հետևանքով համաշխարհային մատակարարման շղթաների խափանման վերաբերյալ Չինաստանի աճող տագնապի մասին։
«Հորմուզի նեղուցը պետք է բաց մնա բնականոն անցման համար, քանի որ դա բխում է տարածաշրջանի երկրների և միջազգային հանրության ընդհանուր շահերից»,- շեշտել է Չինաստանի ղեկավարը։
Նա կոչ է արել հասնել «անհապաղ և համապարփակ հրադադարի»՝ նշելով, որ խնդիրները պետք է լուծվեն քաղաքական և դիվանագիտական ուղիներով։
Չնայած Չինաստանն ունի զգալի ռազմավարական էներգետիկ պաշարներ, Պեկինը մնում է իրանական հում նավթի խոշորագույն գնորդներից մեկը։ Մերձավոր Արևելքում ռազմական գործողությունների երկարաձգումը և ԱՄՆ-ի կողմից իրականացվող ծովային շրջափակումը լուրջ սպառնալիք են ստեղծում Չինաստանի էներգետիկ կայունության համար՝ ստիպելով Պեկինին ավելի ակտիվ միջամտել դիվանագիտական գործընթացներին։