Գերմանիոյ ֆութպոլի ախոյեանութեան` «Պունտըսլիկա»-ի 30-րդ հանգրուանին, Պայերն Միւնիխ 35-րդ անգամ ըլլալով դարձաւ Գերմանիոյ ախոյեան եւ 34-րդ անգամ ըլլալով դարձաւ «Պունտըսլիկա»-ի ախոյեան:
«Պունտըսլիկա»-ն, որ սկսած էր 1963-ին, փոխարինած էր Գերմանիոյ բարձրագոյն դասակարգը, եւ Պայերն Միւնիխ, որ 1932-ին ախոյեան դառնալէ ետք (Պունտըսլիկա» չկոչուած) իր առաջին «Պունտըսլիկա»-ի տիտղոսը շահեցաւ 1968-1969 տարեշրջանին:
1965-ին բարձրանալէ ետք «Պունտեսլիկա»-ի բարձրագոյն դասակարգ, Պայերն Միւնիխ Պեքենպաուըրի, Սեփ Մայերի եւ Կերտ Միւլըրի հետ 1970-ականներուն դարձաւ Եւրոպայի հզօրագոյն ակումբներէն:
Վերադառնալով Պայերն Միւնիխի կիրակի օրուան մրցումին, մարզիչ Վնսան Քոմփանի 8 փոփոխութիւններ կատարած էր Ռէալ Մատրիտի դէմ մրցումէն, ուր բերդապահ Մանուէլ Նոյըր, Եոնաթան Թահ, Տայօ Ուփամեքանօ, Ալեքսանտր Փաւլովիչ, Քանրատ Լայմիր, Հերի Քէյն եւ Մայքըլ Օլիսէ պահեստի աթոռներուն վրայ էին` հանգիստ ընելու առիթ տալով բերդապահ Եոնաս Ուրպեկի, Քիմ Մինճայի, Հերոքի Իթոյի, Լէոն Կորեթցքայի, Ռաֆայէլ Կեթերոյի, Ժամալ Մուսիալայի, Նիքոլաս Ճեքըսնի եւ Ալֆոնսօ Տէյվիսի:
Այս տարեշրջանին Պայերն փաստեց, որ պահեստի մարզիկներն ու հիմնական մարզիկները նոյն մակարդակը ունին եւ մասնաւոր բան չ՛ազդեր մակարդակին վրայ:
Հարցը հոն է, որ Սերժ Կնապրի վիրաւորուած էր փորձի պահուն, ըստ երեւոյթին այդ վէրքը բաւական լուրջ է եւ կը վտանգէ նոյնիսկ անոր մասնակցութիւնը` Մոնտիալին:
Անցեալ շաբաթ ալ 18 տարեկան Լենարտ Քարլ իր կարգին փորձի պահուն վիրաւորուած էր, բայց անոր մկանի պզտիկ պատռուածքը կրնայ կարճ ժամանակէն դարմանուիլ:
Շթութկարթ աւելի լաւ սկսաւ, քան Պայերն ,եւ Քրիս Ֆիւրիչ մրցումին հաշիւը բացաւ 21-րդ վայրկեանին: Հազիւ 10 վայրկեան ետք, Ռաֆայէլ Կերերօ գնդակը զետեղեց Շթութկարթի բերդին մէջ, եւ յաջորդող 6 վայրկեաններով արդէն իսկ արդիւնքը 3-1 էր: Նիքոլաս Ճեքսըն եւ Ալֆոնսօ Տէյվիս կոլեր նշանակեցին Լուիս Տիասի շատ գեղեցիկ փոխանցումներէն օգտուելով:
Բ. կիսախաղին Հերի Քէյն դաշտ ներկայանալէ ետք նշանակեց Պայերնի 4-րդ կոլը, մինչ Օլիսէ քանի մը առիթներ կորսնցնելէ ետք Շթութկարթ 88-րդ վայրկեանին նշանակեց կոլ մը եւս, եւ մրցումը վերջ գտաւ Պայերնի տօնակատարութիւններով:
Օր մը առաջ, Տորթմունտ (Բ. դիրք) 2-1 արդիւնքով պարտութիւն կրած էր Հոֆենհայմէն: