«Ուժեղ Հայաստան» կուսակցության ներկայացուցիչ Գոհար Ղումաշյանը մեկնաբանել է իշխանությունների կողմից իր դեմ առաջադրված մեղադրանքները։
Ղումաշյանը նշել է, որ 2018 թվականին հիմնադրել և ղեկավարում է «Անմահ գունդ» հասարակական կազմակերպությունը, որի միջոցով օգնություն է ցուցաբերել բոլոր հայ վետերաններին, այդ թվում՝ Հայաստանի միակ կին վետերան Ռոզալյա Աբգարյանին։
«Ուժեղ Հայաստան» կուսակցության ներկայացուցիչը բացատրել է, որ Քննչական կոմիտեի կողմից հրապարակված ձայնագրության մեջ ներկայացված է Աբգարյանին ծննդյան օրվա առթիվ նվեր մատուցելը, սակայն իրավաբանները խորհուրդ են տվել նվերներ չտալ, իսկ վետերանին այցելելիս նա միայն քաղցրավենիք է տարել։
«Ի՞նչ ընտրակաշառքի մասին կարող է լինել խոսքը, երբ 103 տարեկան տիկին Ռոզալյա Աբգարյանը նույնիսկ քայլել չի կարողանում։ Ես կլռեի, եթե թիրախավորեին միայն ինձ։ Բայց ես թույլ չեմ տա, որ արատավորեն մեր պատվարժան վետերաններին», – ասել է նա։
Ղումաշյանը նաև հայտնել է, որ վերոնշյալ ձայնագրության մեջ իր երկրորդ զրուցակիցը՝ Հայրենական մեծ պատերազմի վետերանների միավորման նախագահ Սիմոն Եսայանը, տնային կալանքի տակ է։
