Բրյուսելում Հայաստանի արտգործնախարար Արարատ Միրզոյանը հանդիպել է Եվրոպական հանձնաժողովի փոխնախագահ, ԵՄ բարձր ներկայացուցիչ Կայա Կալլասին։ Այս մասին հայտնում է ՀՀ ԱԳՆ-ն:
Ապրիլի 14-ին Բրյուսելում տեղի ունեցած հանդիպման ընթացքում զրուցակիցները դիտարկել են Հայաստան-Եվրոպական միություն գործընկերության ռազմավարական օրակարգի հետևողական իրականացմանն առնչվող հարցեր։
Կողմերը հանգամանալից անդրադարձ են կատարել մայիսին Երևանում նախատեսված ՀՀ-ԵՄ գագաթնաժողովի բովանդակային նախապատրաստական աշխատանքներին։ Ընդգծվել է ՀՀ քաղաքացիների համար շոշափելի արդյունքներ ապահովող ծրագրերի կյանքի կոչման շուրջ ձեռք բերված համաձայնությունը։
Արարատ Միրզոյանը և Կայա Կալլասը քննարկել են նաև ժողովրդավարական դիմակայունության ամրապնդման նախաձեռնությունները, որոնք ՀՀ-ԵՄ ռազմավարական ու արժեքահեն գործընկերության առանցքային մասն են։ Այս շրջանակում պայմանավորվածություն է ձեռք բերվել ապահովել ժողովրդավարական գործընթացներին աջակցող գործող մեխանիզմների շարունակականությունն ու արդյունավետությունը։
ՀՀ արտաքին գործերի նախարարը և ԵՄ բարձր ներկայացուցիչը կարևորել են տնտեսական, տրանսպորտային փոխկապակցվածության ու էներգետիկայի ոլորտներում փոխշահավետ ծրագրերի իրականացումը։
Հանդիպման ավարտին մտքեր են փոխանակվել նաև երկուստեք հետաքրքրություն ներկայացնող այլ թեմաների շուրջ։