Հռոմի պապ Լեւոն XIV-ը կոշտ հակապատերազմական քարոզ է կարդացել Սուրբ Պետրոս տաճարում աղոթքի ժամանակ։ Նա խաղաղության աղոթքի մասին հայտարարել էր ապրիլի 5-ին, երբ նշվում էր կաթոլիկական Զատիկը։
«Աստծո արքայությունում սուր չկա, դրոններ չկան, չկա վրեժ, չկա անարդար շահույթ։ Այնտեղ կա պատնեշ ամենազորության այն խելագարության առջեւ, որը մեր շուրջը դառնում է էլ ավելի ագրեսիվ։ Անգամ Աստծո սրբազան անունն է խառնվում մահվան հետ, բայց նրանք, ովքեր աղոթում են, չեն սպանում եւ չեն սպառնում մահով»,- ասել է հովվապետը։
«Մահվանը ենթարկվում է նա, ով երես է թեքել Աստծուց, որպեսզի իրեն ու իր իշխանությունը դարձնի համր, կույր ու խուլ կուռք։ Բավական է խոնարհվել ինքդ քո եւ փողի առաջ։ Բավական է ուժի ցուցադրումը։ Բավական է պատերազմը»,- շարունակել է հովվապետը։
Նա նշել է, որ պատասխանատվությունն «ընկնում է կառավարողների եւ ամենազորության խելագարության վրա», երբ ժողովուրդները խաղաղության են կոչում։
Դիտորդները նշել են, որ պապի վերջին քարոզներում «ուղիղ նշում» կա Մերձավոր Արեւելքի իրադարձություններին եւ քննադատություն ԱՄՆ վարչակազմի հասցեին։