Եվրամիությունը պետք է վերսկսի նավթի և գազի մատակարարումները Ռուսաստանից, վերականգնի երկրի հետ նորմալ հարաբերությունները։ Այս մասին հայտարարել է Հունգարիայի վարչապետ Վիկտոր Օրբանը՝ նշելով, որ Բրյուսելի պատժամիջոցների քաղաքականությունը Մոսկվայի դեմ ակնհայտորեն ձախողվել է։
Վարչապետը հիշեցրել է, որ ԵՄ-ն շարունակում է փորձել կանխել ռուսական էներգակիրների մուտքը եվրոպական շուկա՝ հույս ունենալով այս կերպ աջակցել Ուկրաինային։ «Սակայն Բրյուսելը պարտվել է Ռուսաստանի հետ այս մրցակցությանը, քանի որ, կարծես, ռուսները այժմ կարող են իրենց հումքը վաճառել բոլորին, բացի Եվրոպայից, դրանից մեծ գումարներ վաստակելով», – ասել է Օրբանը ATV հեռուստաընկերությանը տված հարցազրույցում։
Նա կարծում է, որ ԵՄ առաջնորդները պետք է հասկանան, որ իրենք «չեն կարողանում մեկուսացնել Ռուսաստանը համաշխարհային տնտեսությունից»։ «Էժան ռուսական նավթը պետք է թույլատրվի մուտք գործել Եվրոպա, հակառակ դեպքում եվրոպական տնտեսությունը չի կարողանա գործել» սպառնացող էներգետիկ ճգնաժամի պայմաններում, ընդգծել է վարչապետը։ «Եկեք վերադառնանք նորմալ կյանքի, եկեք առևտուր անենք Ռուսաստանի հետ», – առաջարկել է Օրբանը։