UFC-ի թեթև քաշային կարգի դասակարգման երկրորդ համար Արման Ծառուկյանը հայտնել է աշխարհի առաջատար MMA պրոմոուշենի հետ նոր, շահավետ պայմանագիր ստորագրելու մասին: Հայ մարտիկի խոսքերով՝ նոր համաձայնագրով իր աշխատավարձը կրկնապատկվել է։
Ծառուկյանը մանրամասնել է, որ մարտիկների եկամուտների աճը պայմանավորված է «Paramount» ընկերության հետ UFC-ի կնքած խոշոր գործարքով։
«Այդ համաձայնագրից հետո կազմակերպությունը սկսել է շատ ավելի մեծ գումարներ վճարել։ Պայմանագրերը վերանայվել են։ Նրանք, ովքեր նախկինում ստանում էին 2 միլիոն դոլար, այժմ կվաստակեն 4 միլիոն»,- նշել է Ծառուկյանը։
Չնայած այս դրական տեղաշարժին՝ 29-ամյա մարզիկն ընդգծել է, որ խառը մենամարտերում վարձատրությունը դեռևս զգալիորեն զիջում է բռնցքամարտին։
«Իհարկե, սա դեռ բռնցքամարտիկների հոնորարներից հեռու է, բայց վստահ եմ, որ 3-4 տարվա ընթացքում պատկերը կփոխվի. այսպես անվերջ շարունակվել չի կարող։ Իմ կարծիքով՝ այն մարտիկը, ով UFC-ի չեմպիոն է և պաշտպանում է իր գոտին, պետք է վաստակի առնվազն 10 միլիոն դոլար»,- ասել է Արման Ծառուկյանը։