Թուրքիայի արտաքին գործերի նախարար Հաքան Ֆիդանը կարծում է, որ ԱՄՆ-ին և Իրանին կարող է երկու շաբաթից ավելի ժամանակ պահանջվել բանակցությունների ընթացքում խնդրահարույց հարցերը լուծելու համար։
«Երկու շաբաթը կարող է բավարար չլինել։ Եթե կողմերը համաձայնության գան, հրադադարը կարող է որոշ ժամանակով երկարաձգվել, և բանակցությունները կարող են շարունակվել», – ասել է նա Անկարայում Սիրիայի արտաքին գործերի նախարար Ասաադ ալ-Շեյբանիի հետ համատեղ մամուլի ասուլիսում։
Նա հավելել է, որ «տարածաշրջանը հոգնել է պատերազմներից, օկուպացիայից, ահաբեկչությունից և արյունահեղությունից»։ «Իսրայելի էքսպանսիոնիզմը պետք է լուծվի միջազգային դիվանագիտության միջոցով և միջազգային գործիչների հետ համագործակցությամբ։ Պետք է վերջ դրվի տարածաշրջանային հակամարտություններին։ Հետևաբար, հայտարարվող ծրագրերը, որոնք բաղկացած են տարբեր թվով կետերից, ներառում են նաև տարածաշրջանային անվտանգության ասպեկտներ», – ասել է Ֆիդանը։