Պաշտպանության նախարարության արձագանքը «Քաղաքացիական պայմանագրի» պատգամավոր Հայկ Սարգսյանի՝ բանակում առկա խնդիրների մասին հայտարարություններին նշանակում է, որ պատգամավորն անդրադարձել է գաղտնի տեղեկատվությանը, և գերատեսչությունը զգուշացրել է հնարավոր իրավական պատասխանատվության մասին, հայտարարել է ընդդիմադիր «Պատիվ ունեմ» խմբակցության քարտուղար Տիգրան Աբրահամյանը։
«ԱԺ պաշտպանության և անվտանգության հանձնաժողովում նախօրեին գրանցված տրագիկոմեդիան իր մեջ բազմաթիվ շերտեր էր պարունակում՝ ներիշխանական սուր դիմակայությունից մինչև բանակի ներսում առկա խորը խնդիրներ։ Իշխանությունը չի հանդուրժում իր այն յուրայիններին, ովքեր խոսում են իշխող ռեժիմի ձախողումների, տարբեր ուղղություններում բացասական դինամիկայի և սրացող իրավիճակի մասին», – գրել է նա Ֆեյսբուքում։
Ապրիլի 6-ին գլխադասային հանձնաժողովի նիստի ժամանակ Սարգսյանը քննադատել էր 27-37 տարեկան քաղաքացիների համար 15 մլն դրամ վճարով ծառայությունից ազատելու մասին իր օրինագծի մերժումը՝ մատնանշելով ժամկետային զինծառայողների թվի կրճատումն ու խուսափումների աճը: Նախաձեռնությունը մերժվել էր ԱԺ հանձնաժողովի կողմից: Մեկ օր անց ՊՆ-ն Սարգսյանի հայտարարություններն անվանել էր ապատեղեկատվություն՝ հայտարարելով, որ զորակոչի տվյալները գաղտնի են, միաժամանակ հստակեցնելով, որ զորակոչիկների թիվը 2025 թվականին 2022 թվականի համեմատ աճել է 25,3%-ով:
