Իրաքյան զինված «Կատաիբ Հեզբոլլահ» խմբավորումը ազատ է արձակել ամերիկացի լրագրողուհի Շելլի Քիթլսոնին, ում առևանգել էին մի քանի օր առաջ. հայտնել է ԱՄՆ պետքարտուղար Մարկո Ռուբիոն։
Նա տեղեկացրել է, որ Քիթլսոնի ազատ արձակմանը նպաստել են Պենտագոնի, ԱՄՆ ՀԴԲ-ի և Իրաքի Գերագույն դատական խորհրդի պաշտոնյաներ։ Լրագրողուհին առևանգվել էր մարտի վերջին Բաղդադում։
«Կատաիբ Հեզբոլլահ»-ը երեքշաբթի ավելի վաղ հայտարարել էր, որ ազատ կարձակի Քիթլսոնին և որ նա անմիջապես պետք է լքի Իրաքը։
Նրա ազատ արձակումը հաջորդել է Իրաքի կառավարության և մի քանի ազդեցիկ շիա առաջնորդների ինտենսիվ ջանքերին, ովքեր ճնշում էին գործադրել զինված խմբավորման վրա՝ ապահովելու լրագրողուհու ազատությունը, Reuters-ին հայտնել է իրավիճակին տեղյակ պաշտոնյա։
Մերձավոր Արևելքի նորությունների Al-Monitor կայքը հայտնում է, որ Շելլի Քիթլսոնը ԱՄՆ-ի ֆրիլանսեր լրագրողուհի էր, որը բնակվում էր Հռոմում և տարածաշրջանում լուսաբանել էր մի քանի պատերազմներ։ Նա հոդվածներ էր գրում նաև այդ կայքի համար։
«Կատաիբ Հեզբոլլահ»-ին մոտիկ սոցիալական ցանցում տարածվել է տեսանյութ, որտեղ, իբր, երևում է Քիթլսոնը։