Թուրքական դատարանը արդարացրել է քուրդ ռեժիսոր Ռոջհիլաթ Աքսոյին «թուրքական ազգին և պետական կառույցներին հրապարակայնորեն վիրավորելու» մեղադրանքից՝ Դիարբեքիրում «Ավրորայի արևածագը» ֆիլմի ցուցադրությունը կազմակերպելուց հետո, հայտնում է Bars Media-ն։
Քրեական հետապնդումը սկսվել է Թուրքիայի քրեական օրենսգրքի 301-րդ հոդվածով և վերաբերում է նրա մասնակցությանը Հայոց ցեղասպանությունը վերապրած Ավրորա Մարդիգանյանի մասին ֆիլմի ցուցադրությունը կազմակերպելուն։ Դատախազությունը պնդել է, որ ֆիլմի բովանդակությունը, մասնավորապես՝ 1915 թվականի իրադարձությունները որպես ցեղասպանություն մեկնաբանելը և հայերին որպես բռնության զոհ ներկայացնելը, «վիրավորական» է։
Դատական նիստում պաշտպանության կողմը մերժել է մեղադրանքները՝ պնդելով, որ գործը խոսքի և գեղարվեստական արտահայտման ազատության խախտում է։ Փաստաբանը շեշտել է, որ Աքսոն ֆիլմի հեղինակը չէ, այլ պարզապես մասնակցել է դրա ցուցադրությանը։ Պաշտպանությունը նաև մեջբերել է Մարդու իրավունքների եվրոպական դատարանի պրակտիկան և թուրքական դատարանի որոշումները, որոնք նախկինում ճանաչել էին «Հայոց ցեղասպանություն» տերմինի օգտագործման թույլատրելիությունը խոսքի ազատության շրջանակներում։ Դատավարությունից հետո դատարանը լիովին արդարացրել է Աքսոյին։
«Ավրորայի արևածագը» վավերագրական ֆիլմը հիմնված է Օսմանյան կայսրությունում տեղի ունեցած Հայոց ցեղասպանությունը վերապրած հայ կնոջ՝ Ավրորա (Արշալույս) Մարդիգանյանի իրական պատմության վրա: Ֆիլմը ցուցադրում է ինչպես հայերի դեմ կատարված հանցագործությունները, այնպես էլ թուրքերի և քրդերի կողմից Ավրորայի կյանքը փրկած բարության արարքները:
2023 թվականի նոյեմբերին «Ավրորա արևածագը» ԱՄՆ-ում կայացած կինոփառատոնում ճանաչվել էր լավագույն վավերագրական ֆիլմ:
