ԱՄՆ փոխնախագահ Ջեյ Դի Վենսը Միացյալ Նահանգների անունից հաջողություն է մաղթել Հունգարիայի վարչապետ Վիկտոր Օրբանին այս շաբաթվա վերջին կայանալիք խորհրդարանական ընտրություններում:
«Ամեն ինչից առավել ես պարզապես գնահատում եմ Վիկտորի հետ իմ բարեկամությունը, քանի որ շատ հազվադեպ է հանդիպել մեկին, ով ունի դիվանագիտական տաղանդի և իմաստության նման համադրություն: Մեզ համար (ԱՄՆ-ի համար) շատ կարևոր է, որ մենք շարունակենք պահպանել այս հարաբերությունները Հունգարիայի հետ: Եվ ես գիտեմ, որ հինգ կամ վեց օրից ընտրություններ ունեք, և մենք ցանկանում էինք ողջունել Ձեզ և մաղթել հաջողություն», – ասել է Վենսը Օրբանին Բուդապեշտում բանակցություններից առաջ:
Փոխնախագահը շեշտել է Հունգարիայի հետ բարեկամական հարաբերությունների կարևորությունը Միացյալ Նահանգների համար, հաշվի առնելով, որ հանրապետությունը «կարևոր դեր է խաղում Եվրոպան ուժեղ և բարգավաճ դարձնելու գործում»։
«Դուք իսկական պետական գործիչներից մեկն եք, ես նույնիսկ կասեի՝ Եվրոպայի այն քիչ թվով իսկական պետական գործիչներից մեկը, այն քիչ մարդկանցից մեկը, ով կարող է կապ հաստատել աշխարհի տարբեր ծայրերից եկած մարդկանց հետ և խաղալ խաղաղարարի դեր, տնտեսական առաջնորդի դեր։ Մենք ունենք գերազանց տնտեսական և առևտրային հարաբերություններ, որոնց մասին այսօր կխոսենք», – հավելել է Վենսը։