«Fire Point» ընկերությունը, որը արտադրում է ուկրաինական «Flamingo» թևավոր հրթիռներ, բանակցություններ է վարում եվրոպական ընկերությունների հետ՝ հաջորդ տարի նոր հակաօդային պաշտպանության համակարգ ներդնելու նպատակով․ հայտնում է Reuters-ը։
Նշվում է, որ այդ համակարգը կարող է դառնալ ավելի մատչելի այլընտրանք ներկայումս ավելի ու ավելի դժվար հասանելի դարձող «Patriot» համակարգին։
Ընկերության համահիմնադիր և գլխավոր կոնստրուկտոր Դենիս Շտիլիերմանը հայտարարել է, որ «Fire Point»-ը նպատակ ունի բալիստիկ հրթիռների խոցման արժեքը նվազեցնել՝ այն հասցնելով մեկ միլիոն դոլարից էլ ցածր մակարդակի։
Նա նաև նշել է, որ ընկերությունը սպասում է կառավարության հաստատմանը՝ Մերձավոր Արևելքի խոշոր կոնգլոմերատներից մեկի կողմից ներդրում ստանալու համար։ Այդ կոնգլոմերատը ընկերությունը գնահատում է 2,5 միլիարդ դոլար և կարող է բացել զարգացման նոր ուղղություններ, այդ թվում՝ ցածր ուղեծիր ուղարկվող արբանյակների արձակման ոլորտում։
Ռուսական զորքերի դեմ մարտի դաշտում կուտակված բազմամյա փորձը Ուկրաինային դարձրել է համեմատաբար էժան պաշտպանական տեխնոլոգիաների ոլորտում առաջատար նորարարներից մեկը։ Պարսից ծոցում պատերազմի սկսվելուց հետո Կիևը փորձում է այդ փորձը կիրառել՝ տարածաշրջանի երկրների կառավարությունների հետ անվտանգության ոլորտում համագործակցության համաձայնագրեր կնքելու համար։