Ռուսաստանում վտանգավոր հիվանդություններով միգրանտների նկատմամբ նախատեսվում է կիրառել անհապաղ արտաքսման մեխանիզմ։ Այս մասին հայտարարել է ՌԴ Անվտանգության խորհրդի փոխնախագահ Դմիտրի Մեդվեդևը՝ միջգերատեսչական հանձնաժողովի նիստի արդյունքներով։
Նրա խոսքով՝ արդեն մշակվել է օրենսդրական նախաձեռնությունների փաթեթ, որը հնարավորություն կտա արագ որոշումներ ընդունել այն օտարերկրացիների վերաբերյալ, որոնց ներկայությունը երկրում կարող է համարվել անցանկալի։ Մեդվեդևը ընդգծել է, որ այդ օրենքների ընդունումը չպետք է հետաձգվի։
Պաշտոնյան նշել է, որ համապատասխան մարմինները պետք է ապահովեն վտանգավոր հիվանդությունների արագ հայտնաբերումը օտարերկրացիների շրջանում։ Նման դեպքերում, ըստ նրա, պետք է անմիջապես գործարկվի արտաքսման գործընթացը՝ առանց ավելորդ ձգձգումների։
Առաջարկվող միջոցառումները նպատակ ունեն խստացնել վերահսկողությունը միգրացիոն հոսքերի նկատմամբ և նվազեցնել հանրային առողջության հետ կապված հնարավոր ռիսկերը։