Շրջակա միջավայրի խնդիրների խորացման և ավելի մատչելի էներգիայի աղբյուրների որոնման պատճառով աշխարհում արագ զարգանում է փայտի թափոնների վերամշակումը կենսավառելիքի։ Այն օգտագործվում է թե՛ տեղական էներգիայի արտադրության, թե՛ արտահանման համար և համարվում է տնտեսության ու բնապահպանության համար հեռանկարային ոլորտ։ Այս մասին հայտնել են «Հիդրոօդերևութաբանության և մոնիթորինգի կենտրոն» ՊՈԱԿ-ից:
Պինդ կենսավառելիքը հիմնականում ստացվում է փայտամշակման թափոններից՝ տաշեղից, թեփից, փայտի փոշուց, ինչպես նաև ծառայության ժամկետն ավարտած կահույքից, դռներից ու պատուհաններից։ Երբեմն կիրառվում են նաև բուսական մնացորդներ՝ օրինակ ծղոտ կամ հնդկացորենի կեղև։
Ամենատարածված տեսակներն են՝
- Տաշեղներ` օգտագործվում են որպես վառելիք կամ այլ կենսավառելիքի հումք
- Պելլետներ (վառելիքի հատիկներ)` սեղմված մանրացված թափոններ, լայն կիրառություն ունեն կաթսաներում ջերմային և էլեկտրական էներգիա ստանալու համար
- Բրիկետներ` ավելի խոշոր սեղմված վառելիք՝ տարբեր ձևերով
- Վառելափայտ` ստացվում է ցածրորակ փայտից կամ հատուկ աճեցված արագաճ ծառերից
Օգտագործման ազդեցությունը
Կենսավառելիքի կիրառումը թույլ է տալիս՝
- նվազեցնել ներմուծվող էներգակիրներից կախվածությունը և ծախսերը
- կրճատել փայտի թափոնների կուտակումը
- նվազեցնել մթնոլորտ արտանետվող վնասակար նյութերը
- ստեղծել նոր աշխատատեղեր փայտամշակման ոլորտում
Արդյունքում կենսավառելիքը միաժամանակ լուծում է ինչպես էներգետիկ, այնպես էլ բնապահպանական խնդիրներ: