ՆԱՏՕ-ի գլխավոր քարտուղար Մարկ Ռյուտեն հաջորդ շաբաթ նախատեսված այցով կմեկնի Վաշինգտոն՝ փորձելով հարթել դաշինքի ներսում առաջացած լուրջ ճեղքվածքը։
Ինչպես հայտնում է Reuters-ը, այցը տեղի է ունենում այնպիսի պահի, երբ ԱՄՆ նախագահ Դոնալդ Թրամփը կտրուկ քննադատության է ենթարկել եվրոպական դաշնակիցներին՝ Իրանի դեմ պատերազմի հարցում միասնական չլինելու համար։
Սպիտակ տանը կայանալիք բանակցությունների օրակարգը խիստ լարված է, քանի որ Թրամփն արդեն իսկ հայտարարել է ՆԱՏՕ-ի ֆինանսավորումը կրճատելու մտադրության մասին և նույնիսկ դիտարկում է Միացյալ Նահանգների՝ դաշինքից դուրս գալու հնարավորությունը։
Հատկապես սուր է դժգոհությունը Բրիտանիայի նկատմամբ, որը հրաժարվել է միանալ Մերձավոր Արևելքում իրականացվող ռազմական հարվածներին։ Այս համատեքստում Ռյուտեի այցը դիտվում է որպես ճգնաժամային դիվանագիտության փորձ՝ պահպանելու Ատլանտյան միասնությունը և կանխելու անվտանգային համակարգի հնարավոր փլուզումը։