ՀՀ արտաքին գործերի նախարարության մամուլի խոսնակ Անի Բադալյանն անդրադարձել է Ադրբեջանի ԱԳ նախարարության՝ 2026թ. մարտի 31-ի հայտարարությանը
ԵՐԵՎԱՆ, 1 ապրիլ․/ԱՌԿԱ/․ ՀՀ արտաքին գործերի նախարարության մամուլի խոսնակ Անի Բադալյանն «Արմենպրես»-ի հետ զրույցում անդրադարձել է Ադրբեջանի ԱԳ նախարարության՝ 2026թ. մարտի 31-ի հայտարարությանը։
Նշենք, որ Ադրբեջանի արտաքին գործերի նախարարությունը մարտի 31-ին հայտարարություն էր տարածել՝ կեղծ մեղադրանքներ ներկայացնելով, թե իբր «1918 թվականին հայկական խմբավորումները ցեղասպանություն են իրականացրել ադրբեջանցիների նկատմամբ»։
Անի Բադալյանի խոսքով՝ տասնամյակների պատմություն ունեցած հակամարտության ընթացքում ձևավորվել են մի շարք թշնամական և ոչ հավաստի նարատիվներ, որոնք Ադրբեջանում դեռևս շարունակվում են կիրառվել պետական մակարդակով:
«Հուսով ենք, որ Հայաստանի և Ադրբեջանի միջև հաստատված խաղաղությունը ոչ միայն կծառայի երկու պետությունների և հասարակությունների միջև կայուն խաղաղ համակեցության և բարիդրացիական հարաբերությունների ձևավորմանը, այլև վերջ կդնի մտացածին թեզերի գոյությանն ու կբացառի ատելության խոսքը»,- նշել է խոսնակը:
ԱԳՆ ներկայացուցիչը հիշեցրել է, որ Հայաստանի և Ադրբեջանի ղեկավարները Վաշինգտոնում համապատասխան պայմանավորվածություն են ձեռք բերել։ Մասնավորապես, 2025թ. օգոստոսի 8-ին ստորագրված հռչակագրի 5-րդ կետը հստակ սահմանում է երկու ժողովուրդների միջև թշնամանքի էջը փակելու անհրաժեշտությունը։
Ըստ հռչակագրի՝ մարդկային անասելի տառապանքներ պատճառած հակամարտությունից հետո կողմերը պետք է հնարավորություն ստեղծեն երկու ժողովուրդների համար բարիդրացիական հարաբերություններ սկսելու համար: