ԱՄՆ նախագահն Իրանի հետ հակամարտության ավարտի ժամկետ է նշել
ԵՐԵՎԱՆ, 1 ապրիլ․/Նովոստի-Արմենիա/․ ԱՄՆ նախագահ Դոնալդ Թրամփը չորեքշաբթի հայտարարել է, որ Միացյալ Նահանգները հասել է Իրանի հետ հակամարտության իր նպատակին և նախատեսում է ավարտել այն առաջիկա երկու կամ երեք շաբաթվա ընթացքում: Այս մասին հայտնել է Interfax-ը։
«Ես կասեի՝ երկու շաբաթվա ընթացքում, (…) գուցե երեք», – Սպիտակ տանը լրագրողների հետ զրույցում նշել է Թրամփը:
ԱՄՆ նախագահի խոսքով՝ Իրանը դեռևս հնարավորություն ունի այդ ժամանակահատվածում համաձայնության գալ Վաշինգտոնի հետ։
«Հնարավոր է՝ մենք գործարք կնքենք, որովհետև նրանք ցանկանում են գործարք կնքել: (…) Բայց բավականին կարճ ժամանակ անց մենք կավարտենք», – հավելել է նա:
Անդրադառնալով հակամարտության արդյունքներին՝ Թրամփը շեշտել է, որ իր հիմնական խնդիրը լուծված է. «Տեղի է ունեցել վարչակարգի փոփոխություն: Վարչակարգի փոփոխությունն իմ նպատակների թվում չէր: Ես ունեի մեկ նպատակ՝ նրանք չեն ունենալու միջուկային զենք, և այդ նպատակին հասել ենք: Նրանք միջուկային զենք չեն ունենա»:
Բացի այդ, նախագահն ընդգծել է, որ այլ երկրներն իրենք պետք է որոշեն Հորմուզի նեղուցում նավագնացության ապագայի հարցը:
«Ի՞նչ կլինի նեղուցի հետ: Մենք չենք պատրաստվում որևէ առնչություն ունենալ դրա հետ (…) Մենք դա անելու պատճառներ չունենք», – եզրափակել է ԱՄՆ նախագահը:
