Ավելի քան 230 տարի Լոնդոնում պահված Բրոնզի դարի եզակի վահանը վերադարձվել է Շոտլանդիա։ Վահանը հայտնաբերվել էր 1779 թվականին Բեյթ քաղաքի մոտ գտնվող տորֆային ճահճում և 1791-ին փոխանցվել էր Lոնդոնի Հնագիտական ընկերություն։ Այժմ այն առաջին անգամ ժամանակավոր ցուցադրության է տրամադրվել «Շոտլանդիայի առաջին ռազմիկները» (Scotland’s First Warriors) ցուցահանդեսի շրջանակում, որը կբացվի այս ամռանը՝ Էդինբուրգում։ Վահանը միանում է Բրոնզե դարի ևս հինգ հազվագյուտ վահանների՝ հին Շոտլանդիայի մարտիկների կյանքն ուսումնասիրող ցուցահանդեսում։
Վահանի տրամագիծը մոտ 60–70 սմ է, զարդարված է մուրճով ձևավորված ուռուցիկ տարրերով և ռելիեֆային գծերով։ Դրա վրա երևում են վնասվածքներ՝ հավանաբար նիզակներից ու այլ զենքերից, ինչը ցույց է տալիս, որ այն իրականում օգտագործվել է մարտերում։ Ցուցահանդեսում կներկայացվեն նաև այլ հազվագյուտ վահաններ՝ հայտնաբերված Բորդերսում և Աբերդինշիրում, ինչպես նաև Շոտլանդիայի տարբեր շրջաններից հայտնի միջազգային հնագիտական գտածոներ։ Ցուցահանդեսը կբացվի հունիսի 27-ին և կգործի մինչև 2027 թվականի մայիսը, ընձեռելով յուրահատուկ հնարավորություն ճանաչելու Բրոնզի դարի Շոտլանդիայի մարտիկների կյանքն ու մշակույթը։