Թէեւ 24 մարտին Լիբանանի արտաքին գործոց եւ արտերկրի լիբանանցիներու հարցերու նախարարութիւնը յայտարարեց, որ Լիբանանի մէջ Իրանի դեսպան Մոհամետ Ռեզա Ռաուֆ Շէյպանին Լիբանանի համար «ոչ փափաքելի անձ» է եւ պէտք է մինչեւ 29 մարտ 2026 հեռանայ Լիբանանէն, բայց եւ այնպէս դեսպանը մնաց Լիբանան:
Իրանի արտաքին գործոց նախարարութիւնը 30 մարտին յայտարարեց, որ Լիբանանի մէջ Իրանի դեսպանատունը բաց է եւ Պէյրութի մէջ իր աշխատանքը կը շարունակէ:
Հաւատարմութիւն դիմադրութեան երեսփոխանական պլոքի անդամ Հասան Իզետտին յայտնեց. «Լիբանանի մէջ Իրանի դեսպանի վտարումը մեծ սխալ մըն է, եւ ոչ ոք կրնայ զայն արդարացնել»:
«Կրնանք Դիմադրութեան իրագործած համեմատական հաւասարակշռութեան մասին խօսիլ, եւ մարտի դաշտին վրայ անոր տոկունութիւնը թշնամիի նպատակներու իրագործումը կ՛արգիլէ», նշեց Իզետտին:
«Դիմադրութիւնը թշնամիին պիտի չարտօնէ իր վերահսկողութիւնը ամրապնդել, եւ գիւղ մը կամ շրջան մը մուտք գործելը չի նշանակեր հոն հաստատ մնալ», յայտնեց երեսփոխանը:
«Իզետտին ըսաւ, որ Դիմադրութիւնը յաջողեցաւ Լիբանանի մէջ ձեռք բերել այն, ինչ որ դիւանագիտութիւնը 18 տարուան ընթացքին չյաջողեցաւ իրագործել»:
«Կարգ մը կողմեր իսրայէլեան ծրագիրին համահունչ կը գործեն եւ թշնամին կը հրաւիրեն հայրենիքի գործընկերներուն դէմ», նշեց ան:
Հաւատարմութիւն դիմադրութեան երեսփոխանական պլոքի անդամ Իպրահիմ Մուսաւի իր կարգին յայտնեց. «Թշնամին կ՛ուզէ կրակոցներու տակ բանակցիլ, որպէսզի գերակայ դիրքի վրայ ըլլայ»:
«Աչքերուն փոշի ցանելու փորձ կայ, եւ այսօր մեծ խնդիրը 2 մարտին Դիմադրութեան հասցէին որդեգրուած սխալ որոշումն է», ըսաւ ան:
Երեսփոխանը յայտնեց, թէ` «անհաւանական է, որ պատասխանատու պաշտօն վարող անձը ազգային ջիղէ զուրկ ըլլայ եւ ենթարկուի արտաքին թելադրանքներու»` հաշուի առնելով, որ` «պաշտօնատարները պէտք է իրենց դիրքորոշումները բարձրացնեն Լիբանանի ժողովուրդի հայրենասիրութեան մակարդակին»: Ան աւելցուց, որ` «չէզոք կողմերը կը հաստատեն, որ Իրանի դեսպանին դէմ որոշումին համար որեւէ արդարացում չկայ»: