Միացյալ Նահանգները հետաքրքրված է, որ արաբական պետությունները ծածկեն Իրանի դեմ ռազմական գործողության ծախսերը, հայտարարել է Սպիտակ տան մամուլի քարտուղար Քերոլայն Լիվիթը։
Մարտի 30-ին լրագրողների հետ զրույցում նա նշել է, որ ԱՄՆ նախագահն այդ գաղափարի մասին ապագայում հավանաբար ավելի շատ կխոսի:
Սրա նախադեպը կա․ 1990-ականների Պարսից ծոցի պատերազմում արաբական պետությունները հոգացել են ամերիկյան ռազմական ծախսերի զգալի մասը։
Հինգ արաբական երկրներ (Բահրեյն, Կատար, Քուվեյթ, ԱՄԷ և Սաուդյան Արաբիա) արդեն իսկ թույլատրել են ԱՄՆ-ին օգտագործել իրենց տարածքը և ռազմաբազաները Իրանի դեմ գործողությունների համար։
Սաուդյան Արաբիան և ԱՄԷ-ն ճնշում են գործադրում Վաշինգտոնի վրա՝ ուժեղացնելու հարվածները Իրանի ռազմական ենթակառուցվածքների ուղղությամբ։
Պենտագոնն արդեն հարցում է ներկայացրել ավելի քան 200 միլիարդ դոլարի լրացուցիչ ֆինանսավորման համար՝ Իրանի դեմ ռազմական արշավը շարունակելու նպատակով։
Թրամփի վարչակազմն այս քայլը դիտարկում է որպես դաշնակիցների միջև «բեռի բաշխման» ռազմավարության մաս, հատկապես այն պայմաններում, երբ Իրանի հարձակումները վնասում են հենց այդ տարածաշրջանի երկրների տնտեսությանը: