Ներկա իշխանությունը պետությունը դիտարկում է որպես աշխատելու տեղ. «ՀՀ անվտանգային, պաշտպանական ու իրավական ոլորտների մարտահրավերները» թեմայով քննարկմանն ասել է վերլուծաբան Արման Աբովյանը։
«Եթե մենք խոսում ենք անվտանգության մասին, պետք է հասկանալ, որ լուծման եղանակ չենք կարող ձևավորել, եթե չունենանք երաշխավորված խաղաղություն։ Պետք է շեշտը դնենք և՛ ներքին, և՛ արտաքին սպառնալիքների վրա»,-ասել է նա։
Աբովյանի խոսքով՝ վերջին շրջանում իշխանությունը կատաղի հերքում է երաշխավորված խաղաղությունը` անվանելով այն «օձիք պետության վզին»։
«Իսկ ո՞ւմ է ձեռնտու, որ երկիրը չունենա երաշխավորված խաղաղություն․ միայն այն պետություններին, որ ունեն հավակնություն մեր հայրենիքի հանդեպ։Այն մարդիկ, ովքեր պատասխանատու են երկրի անվտանգության համար, անում են ամեն ինչ այդ անվտանգությունը քայքայելու համար»,-ասել է Աբովյանը։
Գործչի խոսքով՝ յուրաքանչյուր մարդ, որ հայտարարում է, թե պետության սահմաններից դուրս հայրենիք գոյություն չունի, նպաստում է պետության լուծարմանը։