Թուրքիայի արդարադատության նախարար Աքին Գյուրլեքը հայտարարել է, որ Անկարան շարունակելու է աջակցել Հյուսիսային Կիպրոսի ինքնահռչակ թուրքական հանրապետության (ՀԿԹՀ) թուրք ժողովրդի իրավունքների պաշտպանությանն ու միջազգային ճանաչմանը։ Գյուրլեքը այս մասին ասել է՝ Անկարայում, երբ ընդունել է ինքնահռչակ ՀԿԹՀ-ի ներքին գործերի նախարար Դուրսուն Օղուզին և նրա գլխավորած պատվիրակությանը։ Այս մասին գրում է Ermenihaber.am-ը։
Գյուրլեքը նշել է, որ ինքնահռչակ թուրքական հանրապետության «ժողովրդի ազատության, արդարության և հավասարության պայքարին ցուցաբերվող աջակցությունը արտացոլում է երկու կողմերի ընդհանուր արժեքները»։ Նախարարը նաև ընդգծել է, որ Թուրքիան պատրաստ է աջակցել ինքնահռչակ ՀԿԹՀ-ին միջազգային հարթակներում, այդ թվում՝ «Թուրքական պետությունների կազմակերպությունում» (ԹՊԿ) և «Թուրքական պետությունների խորհրդարանական վեհաժողովում» ավելի ակտիվ ներգրավվելու ուղղությամբ:
Գյուրլեքը հավելել է նաև, որ երկու երկրների միջև շարունակվում է իրավական համագործակցության զարգացումը՝ ներառյալ հանցագործների արտահանձնման և իրավական հարցումների իրականացումը։ Ըստ նրա՝ քայլեր են ձեռնարկվում նաև դատավորների և դատախազների վերապատրաստման ուղղությամբ՝ համագործակցությունն առավել ամրապնդելու համար։