Կան հարաբերություններ, որոնք դուրս են սովորական գործնական կապերի սահմաններից։ Դրանք հիմնված են տասնամյակների վստահության, ընդհանուր արժեքների և հայրենիքի հանդեպ անմնացորդ նվիրումի վրա։ Անվանի բժիշկ-ոսկրաբան Արշակ Միրզոյանի և «Hi-Am» հիմնադրամի նախագահ Նշան Աճեմյանի բարեկամությունը հենց այդպիսի մի օրինակելի պատմություն է։
Խոսքի ու գործի նույնականությունը
Արշակ Միրզոյանի համար Նշան Աճեմյանը նախևառաջ այն անհատն է, ում խոսքը հավասարազոր է կատարված գործին։ Մի դարաշրջանում, որտեղ հաճախ նյութականն է թելադրում կանոնները, Աճեմյանի տեսակն առանձնանում է իր բացառիկ հուսալիությամբ։ «Նշան Աճեմյանը բացառիկ վստահություն ներշնչող անձնավորություն է և իր խոսքի տերը։ Եթե նա ասել է՝ կլինի, ուրեմն կասկածից վեր է՝ այդպես էլ լինելու է»,— նշում է բժիշկ Միրզոյանը։ Այդ վստահությունը ձևավորվել է դեռևս 20 տարի առաջ՝ Գլենդելում կայացած առաջին հանդիպման ժամանակ, երբ համատեղ ջանքերով սկսվեց բարդ վիրահատությունների կարիք ունեցող անապահով մարդկանց բուժման գործընթացը։
«Hi Am» և «Արմավենի»․ օպերատիվ բարեգործություն
Հիմնադրամի գործունեությունն Արշակ Միրզոյանը բնութագրում է որպես բազմաշերտ ու մարդակենտրոն։ Այն չի սահմանափակվում մեկ ոլորտով․ Նշան Աճեմյանի ուշադրության կենտրոնում են թե՛ բժշկությունը, թե՛ արվեստը, թե՛ սպորտը։ Հատկապես հատկանշական է հիմնադրամի արձագանքը ճակատագրական պահերին։ Բժիշկը հիշում է 44-օրյա պատերազմի օրերը, երբ անհրաժեշտ էր վիրավորների բուժման համար շտապ միջոցներ հայթայթել․ «Զանգահարեցի Նշան Աճեմյանին, Էդիկ Ազիզյանին ու Մայիս Պարոնյանին և հանգիստ սրտով գնացի քնելու։ Առավոտյան անհրաժեշտ գումարն արդեն փոխանցված էր, և մենք կարողացանք օպերատիվ կերպով ձեռք բերել անհրաժեշտ սարքավորումները՝ վիրավորներին բուժելու համար։ Սա այն տեսակն է, երբ ասված խոսքը հավասարազոր է կատարված գործին»։
Հայաստան-Սփյուռք կամուրջը՝ անկեղծ սիրո հիմքով
Նշան Աճեմյանի գործունեության առանցքներից մեկը Հայաստանն ու Սփյուռքը մեկտեղելն է։ Արշակ Միրզոյանը փաստում է, որ Աճեմյանը ստանձնում է հայ արվեստագետների՝ ԱՄՆ այցերի կազմակերպման բարդ աշխատանքը։ Սակայն ամենաարժեքավորը մարդկային անմիջական ջերմությունն է, որը դրսևորվում է հայրենիքում երեխաների հետ հանդիպման ժամանակ․ «Երբ Նշանը գալիս է Հայաստան, երեխաները նրան դիմավորում են Ձմեռ պապի պես… Ես ականատեսն եմ եղել այդ անկեղծ սիրուն ու ջերմությանը, որ նա տալիս ու ստանում է»։
Ընկերություն՝ զերծ նյութական շահից
Խոսելով ժամանակակից աշխարհի արժեհամակարգի մասին՝ Արշակ Միրզոյանը նշում է, որ իր և Նշանի ընկերությունը խարսխված է անցյալի մեծերի՝ Առնո Բաբաջանյանի, Էդուարդ Միրզոյանի և մյուսների անկեղծ բարեկամության ավանդույթների վրա։ «Իմ և Նշանի հարաբերություններում նյութականը երբեք տեղ չի ունեցել։ Իսկական ընկերությունը պետք է զատ լինի շահից ու նախանձից։ Ինչպես Առնո Բաբաջանյանն էր ասում՝ ընկերը եղբորից թանկ է, քանզի ընկերոջը մենք ինքներս ենք ընտրում՝ ստանձնելով պատասխանատվություն այդ ընտրության համար»։
«Hi-Am» հիմնադրամն ու Նշան Աճեմյանն իրենց տեսակով ապացուցում են, որ իրական հայրենասիրությունը ոչ թե բարձրագոչ հայտարարություններն են, այլ ժամանակին արված քայլը, բուժված հիվանդն ու հայրենիքի կողքին լինելու մնայուն պատրաստակամությունը։