Չինական և հնդկական տանկերները սկսել են օգտվել Թեհրանի կողմից երաշխավորված հատուկ անվտանգության երթուղիներից։ Bloomberg-ի փոխանցմամբ՝ չինական Bright Gold տանկերը երկուշաբթի օրը դուրս է եկել Պարսից ծոցից՝ անցնելով Իրանի իշխանությունների հետ նախապես համաձայնեցված երթուղով։ Նավը նավարկել է իրանական Քեշմ և Լարակ կղզիների միջև ընկած ջրերով՝ բացահայտ ազդանշելով իր չինական պատկանելությունը։
Իրանի Պաշտպանության խորհուրդը հայտարարել է, որ «ոչ թշնամական» պետությունների նավերը կարող են անարգել անցնել նեղուցով, եթե նախապես համակարգեն իրենց տեղաշարժը Թեհրանի հետ։
Այս շաբաթ նույն երթուղուց օգտվել են նաև երկու հնդկական գազատար նավեր։ Սա տեղի է ունեցել այն բանից հետո, երբ Նյու Դելին պաշտոնական բանակցություններ է վարել Իրանի հետ՝ իր բեռների անվտանգ անցումն ապահովելու համար։
Փորձագետները նշում են, որ սա փաստացի ստեղծում է «երկշերտ» նավագնացություն. երկրները, որոնք ունեն լավ հարաբերություններ Իրանի հետ, ստանում են «անվտանգության միջանցք», մինչդեռ մյուսները ստիպված են կա՛մ ռիսկի դիմել, կա՛մ անջատել տեղորոշման համակարգերը։