Իրանի խորհրդարանի նախագահ Մոհամմադ Բաղեր Ղալիբաֆը հերքել է այն պնդումները, որ երկիրը բանակցություններ է սկսել Միացյալ Նահանգների հետ՝ իրավիճակը կարգավորելու համար, փոխանցում է «Ինտերֆաքսը»։
«Միացյալ Նահանգների հետ բանակցություններ չկան։ Կեղծ լուրերն օգտագործվում են ֆինանսական և նավթային շուկաները մանիպուլյացիայի ենթարկելու և այն ճահճից դուրս բերելու համար, որում հայտնվել են Միացյալ Նահանգներն ու Իսրայելը»,- գրել է նա X սոցիալական ցանցում։
Նա հավելել է, որ Իրանի ժողովուրդը պահանջում է «ագրեսորների համար լիակատար պատիժ», և որ Իրանի իշխանությունները հանձնառու են այս նպատակին հասնելուն։
Իր հերթին՝ Իրանի արտաքին գործերի նախարարության խոսնակ Էսմայիլ Բաղային նույնպես հերքել է Միացյալ Նահանգների հետ խորհրդակցությունների մասին հաղորդագրությունները, սակայն ընդունել է, որ Թեհրանը հաղորդագրություններ է ստացել Միացյալ Նահանգներից։
«Որոշ բարեկամ երկրներից հաղորդագրություններ են ստացվել պատերազմը դադարեցնելու համար ԱՄՆ-ի բանակցություններ վարելու խնդրանքի վերաբերյալ»,- ասել է Բաղային։
Նա նշել է, որ Իրանի դիրքորոշումը հակամարտության դադարեցման և Հորմուզի նեղուցը բացելու պայմանների վերաբերյալ մնում է անփոփոխ։ Բաղային հավելել է, որ Թեհրանի հակառակորդներին զգուշացրել են Իրանի ամենակարևոր ենթակառուցվածքների վրա հարձակումների հետևանքների մասին։
Այսօր ավելի վաղ ԶԼՄ-ները հայտնել էին, որ ԱՄՆ-ն բանակցություններ է վարում Իրանի խորհրդարանի խոսնակ Ղալիբաֆի հետ։
ԱՄՆ նախագահ Դոնալդ Թրամփը հայտարարել էր Իրանի էներգետիկ ենթակառուցվածքների դեմ ռազմական հարվածները 5 օրով հետաձգելու մասին։ Truth Social-ում գրառման մեջ նա նշել էր, որ ԱՄՆ-ն և Իրանը վերջին երկու օրում «շատ լավ և արդյունավետ» բանակցություններ են վարել Մերձավոր Արևելքում թշնամանքի լիակատար կարգավորման շուրջ։
ԱՄՆ-ն ու Իսրայելը փետրվարի 28-ին լայնածավալ ռազմական գործողություն էին սկսել Իրանի դեմ: Գործողության արդյունքում զոհվել էին Իրանի բարձրաստիճան զինվորականներ և պաշտոնյաներ, այդ թվում՝ Իրանի գերագույն հոգևոր առաջնորդ Ալի Խամենեին:
Իրանն ի պատասխան՝ հարվածներ էր հասցրել տարածաշրջանի մի շարք երկրներում ԱՄՆ-ի և Իսրայելի թիրախներին: Հարվածներ են հասցվել Բահրեյնում, Հորդանանում, Կատարում, Քուվեյթում, Արաբական Միացյալ Էմիրություններում և Սաուդյան Արաբիայում գտնվող ամերիկյան ռազմակայաններին ու դիվանագիտական ներկայացուցչություններին:
