Armenpress.am-ը գրում է.
Հայաստանի ու Թուրքիայի միջև քննարկվում է երկու երկրների բուհերում միմյանց ուսանողների համար կրթաթոշակներ սահմանելու հնարավորությունը։
«Արմենպրես»-ի հաղորդմամբ՝ այս մասին Ազգային ժողովի արտաքին հարաբերությունների հանձնաժողովի նիստի ընթացքում ասաց ՀՀ ԱԳ նախարար Արարատ Միրզոյանն՝ ներկայացնելով ԱԳՆ-ի 2025 թվականի գործունեության զեկույցը։
Նախարարը մանրամասնեց, որ Հայաստանն ու Թուրքիան այս պահին ունեն բավականին դինամիկ, ակտիվ և խոստումնալից երկխոսություն։
Արարատ Միրզոյանը ներկաներին հիշեցրեց, որ Երևանի ու Անկարայի միջև արդեն իսկ կան հստակ պայմանավորվածություններ, որոնց իրագործման ուղղությամբ երկու երկրներն առաջ են ընթանում։
«Կողմերի միջև այժմ նույնիսկ քննարկվում է երկու երկրների բուհերում միմյանց ուսանողների համար կրթաթոշակներ սահմանելու հնարավորությունը»,-ասաց Միրզոյանը։
Նա նաև հավելեց, որ 2025 թվականի ընթացքում հայ և թուրք պաշտոնյաների միջև տեղի են ունեցել բազմաթիվ հանդիպումներ ու շփումներ, ինչը վկայում է երկու պետությունների միջև դինամիկ կերպով առաջ ընթացող երկխոսության մասին։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ: