ԱՄՆ նախագահ Դոնալդ Թրամփն Իրանին ևս մեկ վերջնագիր է ներկայացրել՝ 48 ժամվա ընթացքում բացել Հորմուզի նեղուցը, հակառակ դեպքում սպառնում է ոչնչացնել երկրի էներգետիկ օբյեկտները։
«Եթե Իրանը 48 ժամվա ընթացքում ամբողջությամբ և առանց սպառնալիքների չբացի Հորմուզի նեղուցը, Միացյալ Նահանգները կհարվածի և կոչնչացնի իրանական էլեկտրակայանները՝ սկսած ամենամեծից», — գրել է Թրամփը Truth Social-ում։
Իրանցի զինվորականները անմիջապես արձագանքել են Սպիտակ տան սպառնալիքին։ «Եթե Իրանի նավթային և էներգետիկ ենթակառուցվածքները հարձակման ենթարկվեն թշնամու կողմից, ապա թիրախ կդառնան տարածաշրջանում ԱՄՆ-ի և ռեժիմի բոլոր էներգետիկ, տեղեկատվական տեխնոլոգիաների և աղազերծման օբյեկտները», — ասվում է Իսլամական հեղափոխության պահապանների կորպուսի հրամանատարության հայտարարության մեջ, որը հրապարակել է Իրանի պետական լրատվական Fars գործակալությունը։
Իրանին իր վերջնագիրը ներկայացնելուց առաջ Դոնալդ Թրամփը պատասխանել էր The New York Times (NYT)-ի լրագրող Դեյվիդ Սանգերի վերլուծությանը, ըստ որի՝ ԱՄՆ նախագահն Իրանում դեռևս չի հասել իր նպատակներին։ «Ոչ, ես հասել եմ, և այն էլ՝ նախատեսվածից մի քանի շաբաթ առաջ։ Նրանց ղեկավարությունը ոչնչացված է, նավատորմն ու օդուժը ոչնչացված են, բացարձակապես ոչ մի պաշտպանություն չունեն, և նրանք ցանկանում են գործարք։ Ես՝ ոչ», — գրել է Սպիտակ տան ղեկավարը Truth Social-ում, նաև հավելել, որ «ԱՄՆ-ն ջնջել է Իրանը երկրի երեսից»։
Հորմուզի նեղուցը, որով անցնում է աշխարհի նավթի և հեղուկ բնական գազի մոտ 20%-ը, գործնականում փակվել է Իրանի կողմից: Եթե նեղուցը փակ մնա այս տարվա երեք եռամսյակների ընթացքում, վերլուծաբանները կանխատեսում են, որ նավթի մեկ բարելի գինը տարեվերջին կարող է հասնել 132 դոլարի: