Իրանի արտաքին գործերի նախարար Աբբաս Արաղչին հայտարարել է, որ Թեհրանը պատրաստ է նպաստել ճապոնական նավերի անցմանը Հորմուզի նեղուցով, որը համաշխարհային էներգակիրների փոխադրման կարևորագույն զարկերակ է, և որ բանակցությունները Ճապոնիայի հետ այս հարցի շուրջ շարունակվում են, հայտնել է Kyodo News-ը։
«Մենք նեղուցը չենք փակել։ Այն բաց է»,- լրատվականի հետ հեռախոսազրույցում ասել է Արաղչին։ Նա նաև ընդգծել է, որ Իրանը, որը փետրվարի վերջին հարձակման է ենթարկվել ԱՄՆ-ի և Իսրայելի կողմից, ձգտում է «ոչ թե հրադադարի, այլ պատերազմի լիակատար, համապարփակ և երկարատև դադարեցման»։
Արաղչին ասել է, որ Իրանը չի փակել ռազմավարական ջրային ճանապարհը, բայց սահմանափակումներ է դրել Իրանի դեմ հարձակումներին մասնակցող երկրների նավերի վրա, միաժամանակ օգնություն առաջարկելով մյուսներին՝ անվտանգության հետ կապված մտահոգությունների ֆոնին։
Նա հավելել է, որ Իրանը պատրաստ է ապահովել Ճապոնիայի նման երկրների անվտանգ անցումը, եթե նրանք համակարգեն իրենց գործողությունները Թեհրանի հետ։
Ճապոնիան Մերձավոր Արևելքից է կախված իր հում նավթի ներմուծման ավելի քան 90 տոկոսի համար, որի մեծ մասն անցնում է նեղուցով։
Արտաքին գործերի նախարարը նշել է, որ մի քանի երկրներ փորձում են միջնորդել հակամարտության դադարեցմանը և ասել, որ Իրանը «բաց է ցանկացած նախաձեռնության համար» և պատրաստ է քննարկել առաջարկները։
Միևնույն ժամանակ, նա ենթադրել է, որ չնայած դիվանագիտական ջանքերը շարունակվում են, Միացյալ Նահանգները դեռևս չի ցույց տվել իր պատրաստակամությունը իրական կարգավորման համար։
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը: Երկու կողմում էլ զոհերի թիվը ժամ առ ժամ փոխվում է։
