ՆԱՏՕ-ի առաքելությունը անվտանգային նկատառումներից ելնելով որոշում է կայացրել ժամանակավորապես դուրս բերել իր անձնակազմի հիմնական մասը Իրաքից: Իրաքյան ուժային կառույցների ներկայացուցիչները հաստատել են, որ սա պլանային և ժամանակավոր քայլ է, որը պայմանավորված է տարածաշրջանում ստեղծված լարված իրավիճակով և չի նշանակում որևէ տարաձայնություն Իրաքի կառավարության հետ:
Դաշինքի ներկայացուցիչները նույնպես հաստատել են առաքելության ձևաչափի «ճշգրտման» փաստը: Այս որոշումը կայացվել է այն բանից հետո, երբ Բաղդադի «Կանաչ գոտում» տեղակայված առաքելության կենտրոնակայանը և հարևանությամբ գտնվող ԱՄՆ դեսպանատունը պատերազմի սկզբից ի վեր բազմիցս ենթարկվել են հարձակումների: Չնայած անձնակազմի մեծ մասի հեռանալուն, երկրում կշարունակեն մնալ սահմանափակ թվով ներկայացուցիչներ՝ իրավիճակը վերահսկելու և անհրաժեշտ կապն ապահովելու համար: