Կուբան չի դիտարկում նախագահ Միգել Դիաս-Կանելին պաշտոնանկ անելու, քաղաքական կարգի «բարեկամական զավթման» կամ փոփոխության հարցը՝ Միացյալ Նահանգներին «հանգստացնելու» համար։ Այս մասին Bloomberg-ին ասել է ՄԱԿ-ում Կուբայի մշտական ներկայացուցիչ Էռնեստո Սոբերոն Գուսմանը։
Նա ավելացրել է, որ Կուբան չի համաձայնի դրան, նույնիսկ Միացյալ Նահանգների պարտադրած փաստացի նավթային շրջափակման պայմաններում։ Դիվանագետն ընդգծել է, որ երկրների միջեւ բանակցությունները պետք է հիմնված լինեն փոխադարձ հարգանքի վրա։ Եթե ԱՄՆ նախագահ Դոնալդ Թրամփն իրականացնի իր սպառնալիքները, Հավանան «կատաղի կդիմադրի»։
«Եթե որեւէ մեկը փորձի ներխուժել Կուբա կամ եթե որեւէ մեկը փորձի ագրեսիա իրականացնել Կուբայի դեմ, նա կբախվի ողջ ժողովրդի հետ՝ 10 միլիոն մարդկանց, ովքեր պատրաստ են պաշտպանել մեր ինքնիշխանությունը, մեր անկախությունը՝ ամեն գնով։ Ես արդեն կորցրել եմ հաշիվը, թե ԱՄՆ քանի նախագահ է փորձել փոխել կառավարությունը Կուբայում։ Իսկ մենք դեռ այստեղ ենք»,- ասել է Գուսմանը։
Bloomberg-ը նշել է, որ Կուբան բախվում է վառելիքի, մատակարարումների եւ ֆինանսավորման պակասի։ Այս շաբաթ երկիրը տուժել է էլեկտրաէներգիայի՝ տարվա մեջ առնվազն վեցերորդ համազգային անջատումից։ Գուսմանը նշել է, որ սա ազդել է նաեւ առողջապահության ոլորտի վրա. էլեկտրաէներգիայի անջատումների պատճառով հազարավոր վիրահատություններ են հետաձգվել, հղի կանայք զրկվել են «բազային» բժշկական ծառայություններից։ Ընդ որում, դիվանագետն ընդգծել է, որ կուբացիները «դիմացկուն ժողովուրդ» են եւ պատրաստ են հաղթահարել այս դժվարությունները։
«Որպես ՄԱԿ-ում դեսպան՝ կարող եմ ասել, որ մենք ունենք երկրների մեծ մասի աջակցությունը»,- ավելացրել է նա։
Մարտի կեսերին Միգել Դիաս-Կանելը հայտնել էր, որ Կուբա վառելիքի մատակարարումները երեք ամիս է՝ չեն իրականացվել։ Հավանայում Ռուսաստանի դեսպան Վիկտոր Կորոնելին հայտնել է, որ ԱՄՆ-ը փաստացի էներգետիկ շրջափակում է հայտարարել Կուբայի դեմ՝ «բացարձակ անհեթեթ պատրվակով»։ ՌԴ նախագահի մամուլի քարտուղար Դմիտրի Պեսկովը փետրվարին հայտնել էր, որ Մոսկվան կապի մեջ է Հավանայի հետ եւ քննարկում է օգնության տարբերակները։
2026թ․ հունվարից ԱՄՆ-ը ուժեղացրել է տնտեսական ճնշումը Կուբայի վրա՝ հայտարարելով այսպես կոչված «կարանտին» երկիր նավթի մատակարարումների վրա։ Թրամփը նաեւ արտակարգ դրություն է հայտարարել ԱՄՆ-ում՝ Հավանայի կողմից ազգային անվտանգությանը սպառնացող սպառնալիքի պատճառով։ Սա, ի թիվս այլ բաների, թույլ է տվել լրացուցիչ մաքսատուրքեր սահմանել հանրապետություն նավթ մատակարարող ցանկացած երկրի համար։ Ամերիկացի առաջնորդը բազմիցս հայտարարել է, որ Կուբան «շուտով կընկնի»։ Նա նաեւ ասել է, որ Իրանի դեմ ԱՄՆ գործողությունների ավարտից հետո Կուբան կունենա «նոր գեղեցիկ կյանք»։