Միացյալ Նահանգների և Իսրայելի զինված ուժերը Իրանի դեմ ռազմական գործողությունների մեկնարկից ի վեր հարվածել են ավելի քան 16,000 թիրախների՝ զգալիորեն թուլացնելով Թեհրանի ռազմական և ենթակառուցվածքային կարողությունները:
WSJ-ը գրում է, որ Իսրայելը մոտ 8,500 հարված է հասցրել՝ օգտագործելով 12,000 զինամթերք, մինչդեռ ԱՄՆ ուժերը հարվածել են առնվազն 7,800 թիրախների և վնասել կամ ոչնչացրել ավելի քան 120 իրանական նավ։
Ըստ Պենտագոնի տվյալների՝ «Epic Fury» գործողության շրջանակում իրականացվող հարձակումների ինտենսիվությունը օրական միջինում գերազանցում է 1,000 թիրախը, ինչը վկայում է տարածաշրջանում օդային բացարձակ գերիշխանության մասին:
Հիմնական հարվածներն ուղղված են եղել Իսլամական հեղափոխության պահապանների կորպուսի հրամանատարական կենտրոններին, հակաօդային պաշտպանության համակարգերին և հրթիռային արտադրամասերին: Վերջին օրերին թիրախավորվել են նաև ռազմավարական նշանակություն ունեցող կետեր, այդ թվում՝ Խարգ կղզու ռազմական օբյեկտները և մի շարք միջուկային ենթակառուցվածքներ:
Մինչ Վաշինգտոնը և Թել Ավիվը հայտարարում են ռազմական նպատակների հաջող իրականացման մասին, Իրանը նախազգուշացնում է հնարավոր պատասխան գործողությունների մասին, ինչը էլ ավելի է սրում լարվածությունը Մերձավոր Արևելքում: