Իրանի պետական լրատվամիջոցները հաղորդել են երկրի խոշորագույն էներգետիկ հանգույցներից մեկի՝ «Հարավային Պարս» գազային հանքավայրի օբյեկտների վրա իրականացված հարձակման մասին:
Իրանական պետական հեռուստատեսության և IRNA գործակալության փոխանցմամբ՝ թիրախավորվել են Բուշեհր նահանգի Ասալույե քաղաքում գտնվող ենթակառուցվածքները, սակայն հարձակման մանրամասների և հնարավոր վնասների մասին հավելյալ տեղեկություններ դեռևս չեն հաղորդվում: Հատկանշական է, որ այս հսկայական ծովային հանքավայրը Իրանը կիսում է Կատարի հետ։
Թեև դեռևս հստակեցված չէ, թե ով է կանգնած այս գործողության հետևում, փորձագետները նշում են, որ ԱՄՆ զինված ուժերը հիմնականում գործում են հենց Իրանի հարավային հատվածում: Սա առաջին դեպքը չէ, երբ թիրախավորվում են Իրանի ռազմավարական էներգետիկ օբյեկտները. ավելի վաղ ամերիկյան ուժերը հարվածներ էին հասցրել Պարսից ծոցում գտնվող Խարգ կղզուն, որը Իրանի նավթային արտահանման հիմնական տերմինալն է: