Միացյալ Թագավորության վարչապետ Քիր Սթարմերը հայտարարել է, որ Լոնդոնը չի ներգրավվի Մերձավոր Արևելքում ընթացող պատերազմին։
Դաունինգ Սթրիթում կայացած մամուլի ասուլիսի ժամանակ նա նշել է, որ բրիտանական կառավարության առաջնահերթությունն է պաշտպանել տարածաշրջանում գտնվող իր քաղաքացիներին։ Միաժամանակ վարչապետը ընդգծել է, որ Բրիտանիան կձեռնարկի անհրաժեշտ քայլեր սեփական և դաշնակիցների անվտանգությունն ապահովելու համար, սակայն չի ցանկանում խորացնել հակամարտությունը։
Սթարմերի խոսքով՝ Լոնդոնը նաև շարունակում է աշխատել արագ քաղաքական լուծման ուղղությամբ, որը կվերականգնի անվտանգությունն ու կայունությունը տարածաշրջանում և կդադարեցնի Իրանից եկող սպառնալիքները հարևան երկրների համար։
Վարչապետը նշել է, որ Բրիտանիան դաշնակիցների հետ քննարկում է Հորմուզի նեղուցի վերաբացման հնարավոր տարբերակները։ Նրա խոսքով՝ եվրոպական գործընկերների հետ մշակվում է «գործնական ծրագիր», որը թույլ կտա ապահովել նավագնացության անվտանգությունը նեղուցում։