Ուկրաինայի շուրջ ընթացող խաղաղության գործընթացն աստիճանաբար փակուղի է մտնում, քանի որ ԱՄՆ նախագահ Դոնալդ Թրամփը կորցնում է բանակցությունների նկատմամբ հետաքրքրությունը Մերձավոր Արևելքում հակամարտության ֆոնին, հաղորդում է Financial Times (FT)-ը՝ հղում անելով աղբյուրներին։
Կիևի հետ խորհրդակցություններին մասնակցող չորս եվրոպացի դիվանագետների կարծիքով՝ Մերձավոր Արևելքում լարվածությունը շեղել է Վաշինգտոնի ուշադրությունը ուկրաինական կարգավորումից։ Այս պայմաններում Ռուսաստանը մի շարք առավելություններ է ստացել. նավթի համաշխարհային գների աճը ամրապնդել է նրա տնտեսական դիրքերը, ԱՄՆ-ի որոշ պատժամիջոցներ մեղմացվել են, իսկ Ուկրաինային անհրաժեշտ զինամթերքի պաշարները սպառվում են։
Եվրոպացի բարձրաստիճան պաշտոնյան հրատարակությանը հայտնել է, որ Մոսկվայի և Կիևի միջև ԱՄՆ միջնորդությամբ ընթացող բանակցությունները «իսկապես վտանգավոր գոտում են»։
Ռուսաստանի նախագահ Վլադիմիր Պուտինի մամուլի քարտուղար Դմիտրի Պեսկովը FT-ին հաստատել է, որ բանակցություններում դադար է։ «Ամերիկացիներն այլ առաջնահերթություններ ունեն, և դա հասկանալի է», – ասել է նա։
Հրատարակությունը նշել է, որ Ռուսաստանի, ԱՄՆ-ի և Ուկրաինայի միջև վերջին բանակցությունները տեղի են ունեցել Ժնևում փետրվարի 17-18-ին։ Հաջորդ փուլը նախատեսված էր մարտի 5-ին Աբու Դաբիում, սակայն հետաձգվել էր Իրանին ԱՄՆ-Իսրայելի հարվածներից հետո։ Մարտի 13-ին Կրեմլը հայտարարել է երկխոսության շարունակության հույսի մասին, սակայն հաջորդ հանդիպման ճշգրիտ ամսաթվերը դեռևս չեն նշանակվել։
Եվրոպացի դիվանագետները FT-ին նաև ասել են, որ որոշ ամերիկյան զենքերի, այդ թվում՝ ՀՕՊ համակարգերի մատակարարումները Ուկրաինա կարող են հետաձգվել, քանի որ ԱՄՆ-ն առաջնահերթություն է տալիս Մերձավոր Արևելքի երկրներից եկող պատվերներին:
«Ակնհայտ է, որ Ամերիկայի ուշադրությունն այժմ կենտրոնացած է Մերձավոր Արևելքի վրա», – հրատարակությանը ասել է ԵՄ արտաքին գործերի նախարար Կայա Կալլասը։
Ըստ FT-ի՝ Մոսկվան նախկինում մերժել էր եվրոպական երկրների առաջարկները՝ բանակցություններին իրենց մասնակցությունը ընդլայնելու վերաբերյալ: Փետրվարին Ֆրանսիայի նախագահ Էմանուել Մակրոնի խորհրդականներ Էմանուել Բոնն ու Բերտրան Բուխվալտերը այցելել են Մոսկվա, որտեղ քննարկել են այդ հարցը Ռուսաստանի նախագահի օգնական Յուրի Ուշակովի հետ: Եվրոպացի դիվանագետներից մեկի խոսքով՝ ռուսական կողմը փաստացի մերժել է ԵՄ-ի մասնակցության գաղափարը բանակցություններին։
Մարտի 14-ին Թրամփը կրկին քննադատել է Ուկրաինայի նախագահ Վլադիմիր Զելենսկիին՝ NBC News-ին տված հարցազրույցում ասելով, որ նրա հետ «շատ ավելի դժվար է բանակցել», քան Ռուսաստանի առաջնորդ Վլադիմիր Պուտինի հետ։ Ամերիկացի նախագահի խոսքով՝ Պուտինը «պատրաստ է գործարք կնքել», մինչդեռ Զելենսկին, նրա կարծիքով, բավարար պատրաստակամություն չի ցուցաբերում փոխզիջման գնալու։
