Իրանի իշխանությունները սպառնացել են Միացյալ Նահանգներին, որ եթե երկրի նավթային և այլ էներգետիկ ենթակառուցվածքների վրա հարձակումներ սկսվեն, տարածաշրջանում ԱՄՆ-ի հետ համագործակցող նավթային ընկերությունների օբյեկտները կոչնչացվեն։ Իսլամական Հանրապետության ղեկավարության ներկայացուցիչը մարտի 14-ին համապատասխան հայտարարությամբ հանդես է եկել Press TV պետական անգլալեզու հեռուստաալիքի եթերում։
Թեհրանի մեկնաբանությունը հնչել է այն բանից հետո, երբ ԱՄՆ նախագահ Դոնալդ Թրամփը հայտարարել է, որ «Մերձավոր Արևելքի պատմության մեջ ամենահզոր ռմբակոծության» հետևանքով ոչնչացվել են Խարգ կղզում գտնվող «բոլոր ռազմական թիրախները»։ Այդ կղզում են գտնվում տերմինալները, որոնց միջով անցնում է Իրանի նավթի արտահանման 90%-ը։
Նաև իրանական Fars պետական լրատվական գործակալությունն է նախազգուշացում տարածել։ Տեքստում նշվում է, որ էներգետիկ ոլորտին ամերիկյան հարվածները կհանգեցնեն «տարածաշրջանային նավթագազային այն բոլոր ենթակառուցվածքների ոչնչացմանը, որոնցում Միացյալ Նահանգները և նրա դաշնակիցները շահագրգռված են»։
Թրամփը նաև ասել է, որ որոշել է «չոչնչացնել» Խարգ կղզու նավթային օբյեկտները, բայց իր որոշումը կարող է վերանայել, եթե Իրանը խոչընդոտի Հորմուզի նեղուցով նավագնացությանը։