«Նոր Սահմանադրության մեջ Անկախության հռչակագրին պետք է հղում չլինի, որովհետև Անկախության հռչակագիրը կառուցված է կոնֆլիկտի տրամաբանության վրա»,- կառավարության ճեպազրույցների սրահում ասաց Նիկոլ Փաշինյանը։
Նրա խոսքով՝ անհնար է կոնֆլիկտի տրամաբանության վրա գնալ և անկախ պետություն կառուցել։
Անդրադառնալով հարցին, թե ինչու է ասել, որ «Կտրիճ Ներսիսյանը և իր խումբը ստանձնել է պատերազմի կուսակցության» առաջնորդությունը, Փաշինյանն ասաց, որ իր խոսքը շատ պարզ բացատրություն ունի։
«Ես գնում եմ պատարագների և տեսնում եմ, որ օրինակ, պատարագի տեքստից շեղվում են և հղում անում Արցախի Հանրապետություն և այլն»,-այսպես հիմնավորեց Փաշինյանը՝ պնդելով, որ եթե բոլորը հղում անեն Արցախի Հանրապետությանը, ապա այն նշանակում է կոնֆլիկտ, քանի որ այդ տեսությունը որդեգրելու ճանապարհին հասնելու ենք կոնֆլիկտի և հավելեց.
«Ամեն նման նախադասություն նշանակում է պատերազմի կոչ՝ այսօր, վաղը, մյուս օրը, էն մյուս օրը, ես չգիտեմ, բայց այն կոչվում է պատերազմի կոչ»։
Շուշիում իր հայտարարությունը՝ «Արցախն Հայաստան է ու վերջ»-ը հիմնավորելիս Փաշինյանը Ասվածաշնչից մոտավորապես մեջբերեց դրույթ, որում ասվում է «Ողբ արեցինք և դուք լաց չեղաք և նվագ հնչեցրինք և դուք պար չեկաք»։