Թուրքիայի զինված ուժերը երկրի հարավ-արևելքում՝ ՆԱՏՕ-ի ռադարային բազայի մոտ, տեղակայել են ամերիկյան Patriot ՀՕՊ համակարգը՝ դաշինքի շրջանակներում իրականացվող օդային պաշտպանության ուժեղացման միջոցառումների շրջանակում, ինչը պայմանավորված է Իրանից հրթիռային սպառնալիքներով: Այս մասին Թուրքիայի պաշտպանության նախարարությունը հայտնել է X-ում:
Համակարգը տեղակայվում է Մալաթիա նահանգում, որտեղ գտնվում է ՆԱՏՕ-ի Քյուրեջիկ ռադարային բազան, որի միջոցով վերջին մեկ շաբաթվա ընթացքում հայտնաբերվել են Թուրքիայի ուղղությամբ շարժվող երկու իրանական բալիստիկ հրթիռներ:
«Տարածաշրջանում վերջին զարգացումների կապակցությամբ ձեռնարկվում են անհրաժեշտ միջոցներ մեր սահմանների և օդային տարածքի պաշտպանության համար, ընթանում են խորհրդակցություններ ՆԱՏՕ-ի մեր դաշնակիցների հետ», – ասվում է հայտարարության մեջ:
Մեկ շաբաթվա ընթացքում Թուրքիայի տարածքում խոցվել են Իրանից արձակված երկու բալիստիկ հրթիռներ, հայտնել է երկրի պաշտպանության նախարարությունը: Առաջին անգամ Ռեջեփ Թայիփ Էրդողանի վարչակազմը հայտարարել էր, որ Թուրքիան պատրաստ է պատասխան միջոցներ ձեռնարկել և խորհրդակցություններ անցկացնել ՆԱՏՕ-ի հետ:
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը: Երկու կողմում էլ զոհերի թիվը ժամ առ ժամ փոխվում է։ Մարտի 1-ի՝ ժամը 15։30-ի դրությամբ, Մերձավոր Արևելքում զոհերի թվում հայեր չկան։
