Ասիական բորսաներն աճ է սկսել

ԱՄՆ նախագահ Դոնալդ Թրամփի հայտարարությունը, թե Իրանում ընթացող պատերազմը կարող է «շատ շուտով ավարտվել», դրական արձագանք է ստացել ֆինանսական շուկաներում․ Ասիա-խաղաղօվկիանոսյան տարածաշրջանի ֆոնդային բորսաներում գրանցվել է աճ։

• Nikkei 225 ինդեքսը Ճապոնիայում աճել է մոտ 2,5%-ով՝ վերականգնվելով երկուշաբթի օրը գրանցված ավելի քան 5% անկումից հետո։
• Հարավային Կորեայի KOSPI ինդեքսը բարձրացել է գրեթե 5%-ով՝ նախորդ առևտրային նստաշրջանի մոտ 6% անկումից հետո։
• Հոնկոնգի Hang Seng Index-ը աճել է շուրջ 1,5%-ով՝ ամբողջությամբ փոխհատուցելով նախորդ օրվա կորուստները։
• Ավստրալիայի S&P/ASX 200 ինդեքսը, որը երկուշաբթի նվազել էր 2,9%-ով, այժմ բարձրացել է գրեթե 1%-ով։

Ֆոնդային շուկաների այս վերականգնումը տեղի է ունեցել նավթի գների կտրուկ տատանումների ֆոնին։ Վերջին 24 ժամում նավթի արժեքը բարձրացել էր մինչև գրեթե 120 դոլար մեկ բարելի համար, սակայն հետագայում նվազել՝ իջնելով 90 դոլարից ցածր։

Երկարատև հակամարտության հնարավորությունը լուրջ անհանգստություն էր առաջացրել էներգետիկ շուկաներում՝ Հորմուզի նեղուցով նավթի տեղափոխման փաստացի դադարեցման մասին մտահոգությունների պայմաններում։ Այդ նեղուցով իրականացվում է աշխարհի ծովային նավթային առևտրի մոտ մեկ հինգերորդը։