Իրանը երկուշաբթի օրը նոր հարձակումներ է իրականացրել Իսրայելի և Պարսից ծոցի երկրների ուղղությամբ՝ այն բանից ժամեր անց, երբ պետական հեռուստատեսությունը հայտարարեց, որ երկրի հանգուցյալ գերագույն առաջնորդի որդին՝ Մոջթաբա Խամենեին, նշանակվել է նրա իրավահաջորդը։
Ինչպես հաղորդում է Associated Press-ը, նա վաղուց էր համարվում այդ պաշտոնի հիմնական թեկնածուներից մեկը՝ դեռ մինչև այն, երբ պատերազմի սկզբում իսրայելական հարվածի հետևանքով սպանվեց նրա հայրը։
Իրանի ազդեցիկ Իսլամական հեղափոխության պահապանների կորպուսը ենթարկվում է հենց գերագույն առաջնորդին, և նոր առաջնորդը կարևոր դեր կունենա պատերազմի ռազմավարության որոշման մեջ։
Միաժամանակ նավթի գները կտրուկ աճել են։ Էներգակիրների թանկացումը նոր մտահոգություններ է առաջացրել, որ այն կարող է արագացնել գնաճը և նվազեցնել ԱՄՆ սպառողների ծախսերը, որոնք երկրի տնտեսության հիմնական շարժիչ ուժն են։
Սաուդյան Արաբիան ևս կոշտ նախազգուշացում է հղել Իրանին՝ հայտարարելով, որ եթե Թեհրանը շարունակի հարձակումները արաբական երկրների վրա, ապա հենց ինքը կլինի «ամենամեծ պարտվողը»։
Սաուդյան հայտարարությունը հնչել է այն բանից հետո, երբ նոր անօդաչու թռչող սարքի հարված է հասցվել երկրի խոշորագույն Շայբա նավթահանքին։