Իրանի արտաքին գործերի նախարար Աբբաս Արաղչին շնորհավորել է Մոջթաբա Խամենեիին Իրանի Գերագույն Առաջնորդ ընտրվելու կապակցությամբ և հավատարմության երդում տվել նոր առաջնորդին՝ երկրի ողջ դիվանագիտական կորպուսի անունից։ Իրանի արտաքին գործերի նախարարի ուղերձը հրապարակվել է նախարարության պաշտոնական կայքում։
Ուղերձում նշվում է, որ նոր Գերագույն Առաջնորդի ընտրությունը «երկրի համար ստեղծված ներկայիս վտանգավոր իրավիճակում երաշխավորում է նրա ինքնիշխանության և տարածքային ամբողջականության պահպանումը և ամրապնդում է ազգային միասնությունը»։ Իր և Իսլամական Հանրապետության բոլոր դիվանագետների անունից Արաղչին «հավատարմության երդում է տվել երկրի երրորդ Գերագույն Առաջնորդին և խոստացավ ոչ մի պահ չհրաժարվել իր հանձնառությունից՝ պաշտպանելու Իրանի ժողովրդի իրավունքները և առաջ մղելու Իրանի ազգային շահերը միջազգային ասպարեզում»։
—
Իրանի Իսլամական հեղափոխության պահապանների կորպուսը (ԻՀՊԿ) հավատարմության երդում է տվել Իրանի նոր հոգևոր առաջնորդ Սեյեդ Մոջթաբա Խամենեիին, հայտնում են իրանական լրատվամիջոցները։
Լրատվամիջոցները նաև կադրեր են հրապարակել, թե ինչպես է Իրանի ժողովուրդը ցնծում և տոնում նոր առաջնորդի ընտրությունը։
Երեկոյան փողոցներում հազարավոր մարդիկ էին հավաքվել։ Նրանք բարձրաձայն վանկարկում էին և թափահարում դրոշները։
Աղբյուր՝ News.am